Surat : વરસાદના વિરામ બાદ અસરગ્રસ્ત રસ્તાઓનું રિપેરીંગ, રિસરફેસીંગ, મેટલવર્ક યુદ્ધના ધોરણે હાથ ધરાયું

સુરત શહેર-જિલ્લામાં ભારેથી અતિ ભારે સાર્વત્રિક વરસાદના કારણે ક્ષતિગ્રસ્ત રસ્તાઓના રિપેરીંગ, રિસર્ફેસીંગ, મેટલવર્ક યુદ્ધના ધોરણે હાથ ધરાયું છે. માર્ગ અને મકાન વિભાગની પેટા વિભાગ નં-2, સુરત દ્વારા કડોદરા સ્થિત વરેલી ગામ પાસેના કડોદરા-સુરત રોડ પર વરસાદમાં અસર પામેલ રોડનું પેવર બ્લોક દ્વારા પેચ વર્ક કરી રસ્તાઓનું રિપેરીંગ કામ હાથ ધરવામાં આવ્યું હતું.

રોડનું મરામત કામ થતાં વાહનચાલકોને રાહત થઈ

સુરત-કડોદરા-બારડોલી રોડ (Discarded NH-06), સુરત શહેર અને કડોદરા તથા બારડોલી સાથે તેમજ એનએચ-48ને જોડતો અગત્યનો રોડ છે. કડોદરા વિસ્તારમાં અનેક ટેક્સટાઈલ ઔદ્યોગિક એકમો કાર્યરત છે. અહીં GIDC વિસ્તારમાંથી રોડ પસાર થયો હોવાથી દિવસ દરમિયાન ભારે વાહનો, કાચા માલ-માલસામાનના ટ્રક તથા હજારો કામદારો અવરજવર કરે છે. સૌથી વ્યસ્ત રોડનું મરામત કામ થતાં વાહનચાલકોને રાહત થઈ છે.

વડોદરામાં માર્ગોનું સમારકામ અને ખાડા પૂરવાની કામગીરી પૂરજોશમાં શરૂ

બીજી તરફ ભારે વરસાદ અને સતત વાહનોની અવરજવરના કારણે માર્ગોને થયેલા નુકસાન બાદ વડોદરા શહેર અને જિલ્લાના માર્ગ અને મકાન વિભાગ દ્વારા સમારકામ અને વિવિધ ટેકનીકસ પ્રયોજીને ખાડા પૂરવાના કામોનો સમાવેશ થાય છે. જેમાં રસ્તાઓના પૂર બાદ શહેર જિલ્લાના 77 માર્ગો ઉપર પડેલા 542 ખાડાઓને પેચવર્ક કરી દુરસ્ત કરવામાં આવ્યા છે. માર્ગ અને મકાન (ગ્રામ્ય)ના કાર્યપાલક ઈજનેર નૈનેષ નાયકાવાલાએ જણાવ્યું કે શહેર અને જિલ્લા વિસ્તાર હસ્તક કુલ 1032.912 કિલોમીટરના માર્ગો છે. જેમાં મેજર પેચવર્ક માટે જરૂરી લંબાઈ 21.430 કિલોમીટર રસ્તા અને માયનોર પેચવર્ક માટે જરૂરી લંબાઈ 16.80 કિલોમીટર રસ્તાઓની પેચવર્ક કામગીરી કરવાની થાય છે. તંત્ર દ્વારા પેચવર્કની કામગીરીને યુદ્ધના ધોરણે હાથે લેવાતા અત્યાર સુધીમાં 90.70% એટલે કે 19.430 કિલોમીટર મેજર પેચવર્ક અને 12.090 કિલોમીટર કામગીરી પૂર્ણ થઈ ગઈ છે. આ સાથે બાકી રહેલી કામગીરી તાત્કાલિક પૂર્ણ કરવાની પ્રક્રિયા હેઠળ છે.