Suratમાં ગેસના કાળાબજારીયાઓ પર પોલીસની 'લાલ આંખ', DG કે.એલ.એન. રાવનું કડક અલ્ટીમેટમ

સુરત શહેરમાં ગેસ સિલિન્ડરની અછતનો લાભ ઉઠાવી કાળાબજારી કરતા તત્વો સામે પોલીસ કમિશનર (DG) કે.એલ.એન. રાવે કડક વલણ અપનાવ્યું છે. તેમણે સ્પષ્ટ ચેતવણી આપી છે કે ગેરકાયદેસર સંગ્રહખોરી કરનાર કોઈપણ શખ્સને છોડવામાં આવશે નહીં. લોકો સુધી રાંધણ ગેસ સમયસર અને વ્યાજબી ભાવે પહોંચી રહે તે માટે સુરત પોલીસ હવે સીધી દેખરેખ રાખશે.

ગેરકાયદેસર સંગ્રહખોરો સામે થશે કાર્યવાહી

આ મામલે DG કે.એલ.એન. રાવે સુરત શહેરના તમામ પોલીસ ઇન્સ્પેક્ટરો (PI) ને ખાસ સૂચના આપી છે. તેમના વિસ્તારમાં આવતી ગેસ એજન્સીઓ અને ગોડાઉનો પર તકેદારી રાખવા તેમજ કોઈ ગેરકાયદેસર રીતે ગેસના બાટલાનો સંગ્રહ ન કરે તે જોવાની જવાબદારી સોંપવામાં આવી છે. પોલીસ હવે એવા લોકોને શોધી કાઢશે જેઓ કૃત્રિમ અછત ઉભી કરી વધુ ભાવ પડાવવાનો પ્રયાસ કરી રહ્યા છે.

લોકો સુધી ગેસ પહોંચાડવા પોલીસ સક્રિય

ગેસનો પુરવઠો વહેલી તકે ગ્રાહકો સુધી પહોંચે તે માટે ગેસ સિલિન્ડર ભરેલા ટ્રકો અને ટેમ્પોને કોઈપણ અવરોધ વિના એજન્સીઓ સુધી પહોંચવા દેવા પોલીસને તાકીદ કરવામાં આવી છે. પોલીસની આ સક્રિયતાને કારણે ગેસ વિતરણ વ્યવસ્થામાં સુધારો આવવાની અને કાળાબજારી અટકવાની આશા સેવાઈ રહી છે. જો કોઈ પણ વ્યક્તિ ગેરકાયદેસર પ્રવૃત્તિમાં સંડોવાયેલી જણાશે તો તેની સામે કાયદાકીય કલમો હેઠળ આકરી કાર્યવાહી કરવામાં આવશે.

ગુજરાતના વધુ સમાચાર વાંચવા માટે ક્લિક કરો