Rajkotના ST બસ સ્ટેન્ડમાં 65 વર્ષના વૃદ્ધે ગુમાવ્યો જીવ, બસની બ્રેક ફેલ થતાં વૃદ્ધને અડફેટે લીધા

રાજકોટના એસ.ટી. બસ સ્ટેન્ડ ખાતે આજે એક અત્યંત દુઃખદ અને ગંભીર અકસ્માતની ઘટના સામે આવી છે. જેમાં મુસાફરોની સલામત સવારી ગણાતી સરકારી બસ જ એક વૃદ્ધ માટે યમદૂત બની હતી. કારણ કે બ્રેક ફેલ થવાના કારણે થયેલા અકસ્માતમાં એક વ્યક્તિનું કરુણ મોત નીપજ્યું છે. આ અકસ્માત રાજકોટ-જસદણ-બોટાદ રૂટની સરકારી બસમાં સર્જાયો હતો. બસ સ્ટેન્ડ પર ઊભેલી આ બસની અચાનક બ્રેક ફેલ થઈ જતાં ડ્રાઇવરે બસ પરનો કાબૂ ગુમાવી દીધો હતો.

રાજકોટ-જસદણ-બોટાદની બસનો અકસ્માત

કાબૂ બહાર થયેલી બસ અનિયંત્રિત રીતે આગળ ધપી હતી. જેના કારણે આ દુર્ઘટના સર્જાઈ હતી. આ ગમખ્વાર અકસ્માતમાં 65 વર્ષના દિનેશભાઈ મારવાણીયા નામના વૃદ્ધ ગંભીર રીતે ઇજાગ્રસ્ત થયા હતા. આ ઘટનાથી બસ સ્ટેન્ડ પર ભારે અફરાતફરીનો માહોલ સર્જાયો હતો. બસ સ્ટેન્ડ જેવી સુરક્ષિત જગ્યાએ બ્રેક ફેલ થવાના કારણે અકસ્માત થતાં મુસાફરોની સુરક્ષા પર ગંભીર સવાલો ઊભા થયા છે.

બસની બ્રેક ફેલ થતા અકસ્માતમાં એકનું મોત

મુસાફરી પહેલા બસોની યોગ્ય જાળવણી અને ટેક્નિકલ ચેકિંગ કરવામાં આવ્યું હતું કે કેમ તે અંગે પણ સવાલો ઊઠી રહ્યા છે. ઘટનાની જાણ થતાં જ પોલીસ કાફલો તાત્કાલિક બસ સ્ટેન્ડ પહોંચ્યો હતો અને અકસ્માત માટે જવાબદાર બસના ડ્રાઇવર વિરુદ્ધ ગુનો નોંધીને કાયદેસરની કાર્યવાહી હાથ ધરી છે. એસ.ટી. વિભાગે પણ આ મામલે તપાસના આદેશ આપ્યા છે.