Rajkot: નવનિર્મિત 'સાંઢિયા પુલ'નું નાયબ મુખ્યમંત્રી હર્ષ સંઘવીના હસ્તે થયું લોકાર્પણ

રાજકોટના જામનગર રોડ તરફ રહેતા અને દૈનિક અપડાઉન કરતા લાખો વાહનચાલકો માટે આજનો દિવસ ઐતિહાસિક સાબિત થયો છે. રાજકોટ મહાનગરપાલિકા (RMC) દ્વારા અત્યંત આધુનિક ડિઝાઇન સાથે તૈયાર કરવામાં આવેલા નવનિર્મિત સાંઢિયા ઓવરબ્રિજનું આજે સત્તાવાર રીતે ઉદ્ઘાટન કરીને જનતા ચરણોમાં સમર્પિત કરવામાં આવ્યો છે.

લાખો વાહનચાલકોની પ્રતીક્ષાનો આખરે અંત

રેલવે લાઇન પર બનેલા જૂના અને સાંકડા સાંઢિયા પુલને કારણે અહીં દરરોજ કલાકો સુધી ટ્રાફિક જામની સ્થિતિ સર્જાતી હતી. એમ્બ્યુલન્સ અને સ્કૂલ બસો પણ આ જામમાં ફસાઈ જતી હતી. આ સમસ્યાના કાયમી નિવારણ માટે મનપા દ્વારા રૂ. ૭૪ કરોડનું માતબર બજેટ ફાળવીને નવો ભવ્ય ઓવરબ્રિજ બનાવવામાં આવ્યો છે. આ બ્રિજ કાર્યરત થતાં જ હવે રાજકોટ અને જામનગર વચ્ચે ચોવીસે કલાક ટ્રાફિકની ગતિ અવિરત રહેશે અને લાખો વાહનચાલકોને સીધો મોટો ફાયદો થશે.

લોકાર્પણ કાર્યક્રમમાં આકર્ષણનું કેન્દ્ર બનેલો રોડ શો

આજે યોજાયેલા ભવ્ય લોકાર્પણ સમારોહમાં ગુજરાતના નાયબ મુખ્યમંત્રી હર્ષ સંઘવીએ તકતી અનાવરણ કરીને અને રીબન કાપીને બ્રિજનું વિધિવત ઓપનિંગ કર્યું હતું. બ્રિજ ખુલ્લો મુકાયા બાદ ડેપ્યુટી સીએમ હર્ષ સંઘવી, રાજકોટના મેયર, ધારાસભ્યો અને મનપાના પદાધિકારીઓ સાથે એક સુશોભિત ખુલ્લી જીપમાં સવાર થયા હતા. તેમણે આખા બ્રિજ પર સવારી કરી રસ્તાની બંને બાજુએ ઉત્સાહભેર ઉભેલા રાજકોટના નાગરિકો અને મીડિયાકર્મીઓનું હાથ હલાવીને અભિવાદન ઝીલ્યું હતું. આ પ્રસંગે મનપાના કમિશનર સહિત સીટી એન્જિનિયરિંગ વિંગના તમામ ઉચ્ચ અધિકારીઓ હાજર રહ્યા હતા.

આ પણ વાંચો: Dang: પૂર્વ જિલ્લા પંચાયત હોદ્દેદાર હરેશ બચ્છાવ ભાજપમાંથી સસ્પેન્ડ, પક્ષ વિરોધી પ્રવૃત્તિઓ બદલ થઈ મોટી કાર્યવાહી