Rajkot: એસટી ડિવિઝનને ફળ્યું દિવાળી વેકેશન, પાંચ દિવસમાં 8,653 ટ્રીપ હાઉસફૂલ થતાં 3.43 કરોડની તોતિંગ કમાણી

દિવાળી અને નૂતન વર્ષના તહેવારોની રજાઓ દરમિયાન મુસાફરોની ભારે અવરજવર રાજકોટ એસટી (GSRTC) ડિવિઝન માટે અત્યંત ફળદાયી સાબિત થઈ છે. તહેવારોમાં વતન જતા અને ફરવા નીકળતા મુસાફરોના ભારે ધસારાને કારણે રાજકોટ એસટી ડિવિઝનની તિજોરી છલકાઈ ગઈ છે. સત્તાવાર આંકડા મુજબ, દિવાળી વેકેશનના માત્ર પાંચ દિવસના સમયગાળામાં જ રાજકોટ એસટી ડિવિઝનને કુલ 3.43 કરોડ રૂપિયાની તોતિંગ કમાણી થઈ છે. આ પાંચ દિવસ દરમિયાન બસોની 8,653 જેટલી ટ્રીપ સંપૂર્ણપણે હાઉસફૂલ દોડી હતી, જે દર્શાવે છે કે મુસાફરોએ સુરક્ષિત અને સસ્તી મુસાફરી માટે એસટી બસો પર પસંદગી ઉતારી છે.

રાજકોટ એસટી ડિવિઝનની રેકોર્ડબ્રેક આવક 

 દિવાળીના તહેવારોમાં મુસાફરોની સુવિધા માટે એસટી વિભાગ દ્વારા વધારાની બસો દોડાવવામાં આવી હતી, જેના પરિણામે પાંચ દિવસમાં 3.43 કરોડ રૂપિયાની જંગી આવક નોંધાઈ છે.રાજકોટ ડિવિઝન હેઠળના વિવિધ ડેપો પરથી ઉપડતી લોકલ, એક્સપ્રેસ અને સ્લીપર કોચ સહિતની કુલ 8,653 ટ્રીપ હાઉસફૂલ થતાં એસટી તંત્રને મોટો આર્થિક ફાયદો થયો છે.

એસટીની વોલ્વો બસ સેવાને જબરદસ્ત પ્રતિસાદ

આરામદાયક અને લક્ઝુરિયસ મુસાફરી માટે જાણીતી એસટીની વોલ્વો (Volvo) બસ સેવાને પણ મુસાફરોનો જબરદસ્ત પ્રતિસાદ મળ્યો છે. માત્ર એક જ દિવસમાં વોલ્વો સેવા થકી ડિવિઝનને 15.72 લાખ રૂપિયાની ઐતિહાસિક અને રેકોર્ડ આવક પ્રાપ્ત થઈ છે. દિવાળી વેકેશન બાદ હવે આગામી દિવસોમાં જૂનાગઢ ખાતે યોજાનારી ગરવા ગિરનારની લીલી પરિક્રમા શરૂ થવા જઈ રહી છે. સૌરાષ્ટ્રભરમાંથી લાખો શ્રદ્ધાળુઓ જૂનાગઢ તરફ ઉમટતા હોવાથી રાજકોટ એસટી ડિવિઝનને લીલી પરિક્રમા દરમિયાન પણ ભરપૂર ટ્રાફિક અને વધુ આવક મળવાની પૂરી આશા છે.

આ પણ વાંચો: Gandhinagar: PM મોદી બોપલ-ગોધાવી સ્થિત સંસ્કારધામ ટ્રસ્ટની બેઠકમાં આપશે હાજરી, આગામી શૈક્ષણિક આયોજનો પર કરશે ચર્ચા!