Rain News : નવરાત્રિ પર મેઘરાજાનું ગ્રહણ, ડાંગ અને વલસાડમાં ભારે વરસાદથી ગરબા આયોજકોમાં દોડધામ!

નવરાત્રિના ઉત્સવ દરમિયાન ડાંગ જિલ્લાના વઘઈ સહિતના વિસ્તારોમાં વાવાઝોડા સાથે ધોધમાર વરસાદ પડ્યો છે. અચાનક પડેલા આ વરસાદને કારણે ગરબાના આયોજકો અને સંચાલકોમાં ભારે દોડધામ મચી ગઈ હતી. ગરબાના મેદાનોમાં વરસાદી પાણી ભરાઈ જતાં આયોજકોને તાત્કાલિક મંડપ અને સાઉન્ડ સિસ્ટમને બચાવવા માટે પ્રયત્નો કરવા પડ્યા હતા. વરસાદે ગરબાના રંગમાં ભંગ પાડતાં ગરબા રમવા આવેલા ખેલૈયાઓમાં પણ ચિંતાનું મોજું ફરી વળ્યું છે, કારણ કે પાણી ભરાયેલા મેદાનોમાં ગરબા રમવાનું શક્ય નથી.

વલસાડમાં મેઘરાજાનું ફરી આગમન

વરસાદ માત્ર ડાંગ પૂરતો સીમિત ન રહેતા વલસાડ જિલ્લામાં પણ મેઘરાજાનું ફરી આગમન થયું છે. નવરાત્રિના તહેવારની બરાબર વચ્ચે જ ભારે પવન અને ગાજવીજ સાથે વરસાદ પડતાં આયોજકોની મુશ્કેલીમાં વધારો થયો છે. વરસાદના કારણે ખુલ્લા મેદાનોમાં આયોજિત ગરબાના સ્થળો પર પાણી ભરાઈ ગયા છે, જેને કારણે રાત્રિના સમયે ગરબા યોજી શકાય તેવી સ્થિતિ નથી. વરસાદે ખેલૈયાઓના ઉત્સાહ પર પાણી ફેરવી દીધું છે, જેઓ આખું વર્ષ આ તહેવારની રાહ જોતા હોય છે.

ખેલૈયાઓ અને આયોજકો ચિંતામાં

વરસાદને કારણે ગરબાના કાર્યક્રમો સમયસર શરૂ થઈ શકતા નથી અને કેટલીક જગ્યાએ તો રદ કરવાની પણ ફરજ પડી છે. આ અણધાર્યા વરસાદથી આયોજકોને મોટા આર્થિક નુકસાનની ભીતિ સતાવી રહી છે. બીજી તરફ, ખેલૈયાઓ પણ તૈયાર થઈને આવ્યા બાદ વરસાદને કારણે નિરાશ થઈ રહ્યા છે. આયોજકો હવે મેદાનોને ઝડપથી સૂકવવા માટેના પ્રયાસો કરી રહ્યા છે, જેથી બાકીના દિવસોમાં ગરબાના કાર્યક્રમો ફરી શરૂ કરી શકાય. હવામાન વિભાગની આગાહીને કારણે હવે આયોજકો અને ખેલૈયાઓ બંનેમાં ચિંતાનો માહોલ છે, કે ક્યાંક નવરાત્રિના બાકીના દિવસો પણ વરસાદની ભેટ ન ચઢી જાય.