Palitanaના ખાખરીયા ગામે મંદિરમાં ચોરીનો પ્રયાસ, ગ્રામજનોએ શકમંદ યુવકને રંગેહાથ ઝડપી પાડ્યો

ભાવનગર જિલ્લાના પાલીતાણા તાલુકામાં આવેલા ખાખરીયા ગામે ધાર્મિક સ્થાનને નિશાન બનાવી ચોરી કરવાનો પ્રયાસ થયો હોવાની ગંભીર ઘટના સામે આવી છે. ગામમાં આવેલા એક મંદિરમાં અજાણ્યા યુવક દ્વારા ચોરી કરવાનો નિષ્ફળ પ્રયાસ કરવામાં આવ્યો હતો. યુવક મંદિરમાં ચોરીનો પ્રયાસ કરી રહ્યો હતો તે સમગ્ર ઘટનાના CCTV ફૂટેજ પણ સામે આવ્યા છે, જેના આધારે તેની શંકાસ્પદ હિલચાલ છતી થઈ હતી.

ગ્રામજનોની સતર્કતાથી યુવક ઝડપાયો, પોલીસ મથકે લવાયો

મંદિરમાં ચોરીનો પ્રયાસ થતાં જ સ્થાનિક રહીશોએ સમયસૂચકતા અને સતર્કતા દાખવીને સ્થળ પરથી જ યુવકને રંગેહાથ ઝડપી લીધો હતો. ઘટનાને પગલે આસપાસના લોકોના ટોળેટોળાં એકઠા થઈ ગયા હતા. ગ્રામજનોએ પકડાયેલા યુવકને તુરંત જ પોલીસ હવાલે કર્યો હતો. પોલીસે યુવકની અટકાયત કરીને તેને પાલીતાણા પોલીસ સ્ટેશન લાવી આગળની કાયદેસરની તપાસ હાથ ધરી છે.

પુરાવા સાથે તંત્ર પાસે કડક કાર્યવાહીની માંગ

આ ઘટનાના પગલે ખાખરીયા ગામના રહીશો અને શ્રદ્ધાળુઓમાં ભારે રોષ અને આક્રોશ જોવા મળી રહ્યો છે. ગ્રામજનોએ યુવક વિરુદ્ધ ચોરીના પ્રયાસના પૂરતા પુરાવારૂપ સીસીટીવી (CCTV) ફૂટેજ પણ પોલીસને સોંપ્યા છે. ધાર્મિક સ્થળની પવિત્રતા અને સુરક્ષાને ધ્યાને રાખીને, પકડાયેલા યુવક સામે પોલીસ તંત્ર દ્વારા કડકમાં કડક કાર્યવાહી કરવામાં આવે તેવી ઉગ્ર માંગ સ્થાનિકો દ્વારા કરવામાં આવી છે.

ગુજરાતના વધુ સમાચાર વાંચવા માટે ક્લિક કરો