Navsariની પૂર્ણા નદીમાં મોતની છલાંગ લગાવનાર યુવક માટે ફાયર બ્રિગેડ 'દેવદૂત' બની

નવસારી શહેરમાંથી પસાર થતી પૂર્ણા નદી આજે એક યુવાન માટે જીવન-મરણનો સવાલ બની ગઈ હતી. શહેરના ધારાગીરી વિસ્તાર નજીક એક અજાણ્યા યુવકે અગમ્ય કારણોસર પૂર્ણા નદીના ઉંડા પાણીમાં ઝંપલાવી આપઘાતનો પ્રયાસ કર્યો હતો. જોકે, નવસારી નગરપાલિકાના ફાયર વિભાગની અદભૂત સતર્કતા અને ક્ષણાર્ધની સ્ફૂર્તિને કારણે એક માનવ જિંદગી બચાવવામાં મોટી સફળતા મળી છે.

ઘટનાની જાણ થતાં જ ફાયર વિભાગ એક્શનમાં

જેવો યુવકે નદીમાં છલાંગ લગાવી, કે તુરંત જ આસપાસના લોકોએ બૂમાબૂમ કરી મૂકી હતી. આ અંગેની જાણ નવસારી ફાયર વિભાગને કરવામાં આવતા, ફાયર ફાઈટરની ટીમ લાઈફ જેકેટ અને રેસ્ક્યૂ બોટ સાથે તાત્કાલિક ઘટનાસ્થળે દોડી ગઈ હતી. નદીના વહેતા પાણીમાં યુવક ડૂબી રહ્યો હતો, ત્યારે ફાયર વિભાગના જવાનોએ કોઈ પણ વિલંબ વગર નદીમાં ઉતરી દિલધડક રેસ્ક્યૂ ઓપરેશન હાથ ધર્યું હતું.

ફાયર જવાનોની સમયસૂચકતાથી મળ્યું નવજીવન

ફાયર વિભાગની ટીમે ભારે જહેમત બાદ ડૂબતા યુવકને સુરક્ષિત રીતે બહાર કાઢી લીધો હતો. યુવકને નદીમાંથી બહાર કાઢ્યા બાદ તેને તાત્કાલિક પ્રાથમિક સારવાર આપી હોસ્પિટલ ખસેડવામાં આવ્યો છે. ફાયર વિભાગની આ કામગીરીને પગલે સ્થાનિક લોકોએ જવાનોની બહાદુરીને બિરદાવી હતી. હાલમાં પોલીસે આ મામલે તપાસ હાથ ધરી છે કે યુવકે કયા કારણોસર આ આત્મઘાતી પગલું ભર્યું હતું.

ગુજરાતના વધુ સમાચાર વાંચવા માટે ક્લિક કરો