Mehsanaના પ્રખ્યાત બહુચરાજી મંદિરમાં દાનની ગણતરીનો ધમધમાટ શરૂ, અઢી વર્ષથી કોથળામાં ભરેલા દાનનો થશે હિસાબ!

ઉત્તર ગુજરાતના પ્રખ્યાત અને શ્રદ્ધાનું કેન્દ્ર ગણાતા મહેસાણા જિલ્લાના બહુચરાજી માતાજીના મંદિરમાં લાંબા સમયથી રાહ જોવાયેલી દાનની ગણતરી આખરે શરૂ થઈ ચૂકી છે. અંદાજે અઢી વર્ષથી બેંકમાં કે અન્યત્ર જમા ન થવાને કારણે કોથળામાં ભરીને પેક કરાયેલા દાનની રકમની ગણતરીનો ધમધમાટ શરૂ થયો છે. આ મેગા દાન ગણતરી આગામી 6 નવેમ્બર સુધી સઘન સુરક્ષા અને નિયમો વચ્ચે ચાલુ રહેશે, જેમાં માતાજીના ભક્તો દ્વારા ચઢાવવામાં આવેલી અઢળક રોકડ અને સોના-ચાંદીના દાગીનાનો હિસાબ બહાર આવશે.

નાયબ કલેક્ટરની દેખરેખ હેઠળ સઘન વ્યવસ્થા

દાનની ગણતરીમાં પારદર્શિતા જળવાઈ રહે અને કોઈપણ પ્રકારની ગેરરીતિ ન થાય તે માટે વહીવટી તંત્ર દ્વારા અત્યંત કડક પગલાં લેવામાં આવ્યા છે. આ સમગ્ર પ્રક્રિયા માટે નાયબ કલેક્ટર સહિતના ઉચ્ચ મહેસૂલી અધિકારીઓની ખાસ ટીમો તૈનાત કરવામાં આવી છે. ગણતરી કામગીરીમાં જોડાનાર કર્મચારીઓ કે ગણતરીદારો માટે વિશેષ આચારસંહિતા બનાવાઈ છે, જે અંતર્ગત તેઓને ખિસ્સાવાળા કપડા અને મોજા (Socks/Gloves) પહેરવા પર સખત પ્રતિબંધ ફરમાવવામાં આવ્યો છે.

ભંડાર કક્ષમાં મોબાઈલ અને રોકડ પર પ્રતિબંધ

ભંડાર કક્ષની અંદર દાન ગણતરી દરમિયાન કોઈપણ અનિચ્છનીય ઘટના કે ભ્રષ્ટાચારને રોકવા માટે હાઈ-ટેક અને કડક સુરક્ષા બંદોબસ્ત રખાયો છે. ભંડાર કક્ષમાં કોઈ વ્યક્તિ મોબાઈલ ફોન, અંગત રોકડ કે દાગીના સાથે લઈ જઈ શકશે નહીં. આ ઉપરાંત, ગેરરીતિની તમામ શક્યતાઓને નાબૂદ કરવા માટે ગણતરીમાં નિયુક્ત કરાયેલા મહેસૂલી અધિકારીઓની ફરજમાં રોજેરોજ ફેરફાર કરવામાં આવશે અને સમગ્ર પ્રક્રિયાનું સીસીટીવી કેમેરા દ્વારા સતત મોનિટરિંગ કરવામાં આવશે.

આ પણ વાંચો : Ahmedabad News : ગુજરાત હાઈકોર્ટનો યુનિવર્સિટીને મોટો આદેશ, ભરતી ગેરરીતિ કેસમાં સસ્પેન્ડ થયેલા બે પ્રોફેસરોને ફરજ પર લેવા હુકમ!