Khambhaliya: કાર અને ટ્રક વચ્ચે ગમખ્વાર અકસ્માત સર્જાતા 2 પિતરાઇ ભાઇના કરૂણ મોત

જામ ખંભાળિયા બાયપાસ રોડ પર મોડી રાત્રે એક ગમખ્વાર અકસ્માત સર્જાતા બે પિતરાઈ ભાઈઓના કરુણ મોત થયા છે. આ ઘટનામાં એક ઈનોવા કાર અને ટ્રક વચ્ચે ધડાકાભેર અથડામણ થઈ હતી, જેના કારણે કારનો કચ્ચરઘાણ વળી ગયો હતો. મળતી માહિતી મુજબ, આ અકસ્માત જામ ખંભાળિયા બાયપાસ રોડ પર થયો હતો. મોડી રાત્રે ઈનોવા કાર પસાર થઈ રહી હતી ત્યારે અચાનક એક પશુ રોડ પર આવી જતા તેને બચાવવા જતા કારચાલકે કાબૂ ગુમાવ્યો હતો. પરિણામે, કાર સામેથી આવતી ટ્રક સાથે જોરદાર રીતે અથડાઈ હતી. ટક્કર એટલી ભયાનક હતી કે ઈનોવા કારનો આગળનો ભાગ સંપૂર્ણપણે નાશ પામ્યો હતો.

જામ ખંભાળિયામાં ગમખ્વાર અકસ્માત

આ અકસ્માતમાં કલ્યાણપુર તાલુકાના ગઢકા ગામના બે યુવાનોના કમકમાટીભર્યા મૃત્યુ થયા છે. મૃતકોની ઓળખ પ્રિતરાજસિંહ યોગેન્દ્રસિંહ જાડેજા અને પ્રતિપાલસિંહ પરાક્રમસિંહ જાડેજા તરીકે થઈ છે. આ બંને યુવાનો પિતરાઈ ભાઈઓ હતા. તેમના મૃત્યુના સમાચાર મળતા જ તેમના પરિવારમાં અને સમગ્ર ગામમાં શોકનો માહોલ છવાઈ ગયો છે.

કાર-ટ્રક વચ્ચે અકસ્માત સર્જાતા બે ભાઇના મોત

ઘટનાની જાણ થતા જ સ્થાનિક પોલીસ અને 108 એમ્બ્યુલન્સની ટીમ તાત્કાલિક ઘટનાસ્થળે પહોંચી હતી. કારમાં ફસાયેલા બંને યુવાનોને બહાર કાઢવામાં આવ્યા હતા, પરંતુ ગંભીર ઈજાઓને કારણે તેમનું ઘટનાસ્થળે જ નિધન થઈ ચૂક્યું હતું. પોલીસે બંને મૃતદેહને પોસ્ટમોર્ટમ માટે હોસ્પિટલ મોકલી આપ્યા છે અને અકસ્માત અંગે વધુ તપાસ હાથ ધરી છે. બે યુવાનોના અકાળે અવસાનથી સમગ્ર વિસ્તારમાં ગમગીની છવાઈ ગઈ છે.