Junagadh News: સાસણ ગીરમાં જામશે ઉત્સવનો રંગ, 'મોન્સૂન' અને 'મેંગો' ફેસ્ટિવલની મંત્રીઓએ કરી જાહેરાત

એશિયાટિક સિંહોના ઘર ગણાતા સાસણ ગીરની મુલાકાતે આવતા પ્રવાસીઓ માટે રાજ્ય સરકાર દ્વારા મોટા સમાચાર આપવામાં આવ્યા છે. સાસણ ગીરના પ્રવાસન ક્ષેત્ર અને સ્થાનિક ખેતીને વૈશ્વિક સ્તરે વેગ આપવા માટે આગામી સમયમાં બે મોટા મહોત્સવોનું આયોજન કરવામાં આવશે. આ અંગે મંત્રી જીતુ વાઘાણી અને અર્જુન મોઢવાડિયાએ સંયુક્ત જાહેરાત કરી છે.

ચોમાસામાં ગીર ખીલી ઉઠશે: મોન્સૂન ફેસ્ટિવલ

ચોમાસા દરમિયાન ગીરની પ્રકૃતિ સોળે કળાએ ખીલી ઉઠતી હોય છે. પ્રકૃતિ પ્રેમીઓ આ મનોહર નજારાનો આનંદ માણી શકે તે માટે સાસણ ગીરમાં 'મોન્સૂન ફેસ્ટિવલ' યોજવાનો નિર્ણય લેવાયો છે. સામાન્ય રીતે ચોમાસામાં સિંહોનું વેકેશન હોવાથી જંગલ બંધ હોય છે, પરંતુ આ ફેસ્ટિવલ દ્વારા પ્રવાસીઓ ગીરની વનરાજી અને વન્યસૃષ્ટિની સમીપ જઈ શકશે.

કેસર કેરીના પ્રચાર માટે મેંગો ફેસ્ટિવલ

આગામી વર્ષે ગીરની વિશ્વવિખ્યાત કેસર કેરીના માનમાં 'મેંગો ફેસ્ટિવલ' (Mango Festival) નું ભવ્ય આયોજન કરવામાં આવશે. આ મહોત્સવનો મુખ્ય ઉદ્દેશ્ય કેસર કેરીના બ્રાન્ડિંગ અને પ્રચાર દ્વારા સ્થાનિક ખેડૂતોને આર્થિક ફાયદો પહોંચાડવાનો છે. આ ફેસ્ટિવલને કારણે પ્રવાસીઓ સીધા જ ખેડૂતો પાસેથી કેરીની ખરીદી કરી શકશે અને ગીરની કૃષિ સંસ્કૃતિથી પરિચિત થશે.

પ્રવાસન અને કૃષિને મળશે નવો વેગ

કૃષિ અને વન મંત્રીની આ ખાસ જાહેરાતથી જૂનાગઢ જિલ્લાના અર્થતંત્રને મોટો વેગ મળે તેવી શક્યતા છે. આ બંને ઉત્સવો સાસણ ગીરને માત્ર વન્યજીવ પ્રેમીઓ માટે જ નહીં, પરંતુ પ્રકૃતિ અને ફળ પ્રેમીઓ માટે પણ એક આકર્ષક પર્યટન સ્થળ તરીકે સ્થાપિત કરશે. મંત્રીઓએ જણાવ્યું હતું કે, આ આયોજનથી સ્થાનિક રોજગારીમાં પણ નોંધપાત્ર વધારો થશે.

આ પણ વાંચો - Junagadh News: વિલિંગ્ડન ડેમની કૂંડીમાં ન્હાવા પડેલા ત્રણ પરપ્રાંતિય યુવાનો ડૂબ્યા, એકનો મૃતદેહ મળ્યો