Halvadમાં ઉઠાવગીરો થયા સક્રિય, ધોળા દિવસે કારનો કાચ તોડી રૂ.1.10 લાખની ચોરી!

મોરબી જિલ્લાના હળવદ શહેરમાં ચોર અને ઉઠાવગીરો બેફામ બન્યા હોય તેવો એક ચોંકાવનારો કિસ્સો સામે આવ્યો છે. હળવદમાં આવેલા ડો. બાબાસાહેબ આંબેડકર શોપિંગ સેન્ટર પાસે આજે બપોરના સમયે તસ્કરોએ એક પાર્ક કરેલી કારને નિશાન બનાવી હતી. અજાણ્યા શખ્સે કારનો કાચ તોડીને અંદર રાખેલી મોટી રોકડ રકમની સરેઆમ ચોરી કરી પલાયન થઈ ગયો હતો. દિવસના અજવાળામાં બનેલી આ ઘટનાથી સ્થાનિક વેપારીઓમાં ભારે અરેરાટી વ્યાપી ગઈ છે.

દવાની એજન્સીનો વેપારી બન્યો શિકાર 

ચોરીનો ભોગ બનનાર વ્યક્તિ રાજકોટના જંતુનાશક દવાના વેપારી હોવાનું સામે આવ્યું છે. વેપારી હળવદ વિસ્તારમાં દવાની દુકાનો અને ગ્રાહકો પાસેથી ઓર્ડર લેવા માટે આવ્યા હતા. તેમણે પોતાની કાર શોપિંગ સેન્ટર પાસે પાર્ક કરી હતી અને પોતાના કામે ગયા હતા. આ દરમિયાન તકનો લાભ ઉઠાવીને તસ્કરે કારની બારીનો કાચ તોડી અંદર રાખેલા રૂ.1.10 લાખની રોકડ રકમ ભરેલી બેગ કે મત્તા ચોરી લીધી હતી અને ફરાર થઈ ગયો હતો.

તસ્કરો કારમાંથી રોકડ લઈ થયા ફરાર 

વેપારી જ્યારે પરત ફર્યા ત્યારે કારનો કાચ તૂટેલો જોઈને દંગ રહી ગયા હતા અને તાત્કાલિક આ અંગે હળવદ પોલીસ મથકે જાણ કરી હતી. બનાવની માહિતી મળતાં જ પોલીસ કાફલો ઘટનાસ્થળે દોડી આવ્યો હતો. પોલીસે આસપાસના સીસીટીવી (CCTV) કેમેરા તપાસતાં ચોરી કરતો શખ્સ સ્પષ્ટપણે કેમેરામાં કેદ થયેલો જોવા મળ્યો હતો. પોલીસે સીસીટીવી ફૂટેજના આધારે આરોપીની ઓળખ છતી કરી તેને ઝડપી પાડવા માટેના ચક્રો ગતિમાન કર્યા છે.

ગુજરાતના વધુ સમાચાર વાંચવા માટે ક્લિક કરો