Gujaratમાં અષાઢી દૂજની રથયાત્રાને પગલે કડક સુરક્ષા: 10થી 17 જુલાઈ સુધી પોલીસ જવાનોની રજાઓ પર પ્રતિબંધ

પવિત્ર અષાઢી બીજની પરંપરાગત રથયાત્રાના તહેવારને ધ્યાનમાં રાખીને ગુજરાત પોલીસ વિભાગ દ્વારા એક મોટો નિર્ણય લેવામાં આવ્યો છે. રાજ્યના કાયદા અને વ્યવસ્થાની પરિસ્થિતિ ચુસ્ત અને તંદુરસ્ત જળવાઈ રહે તે હેતુથી ડાયરેક્ટર જનરલ ઓફ પોલીસ (DGP) કચેરી દ્વારા એક ખાસ પરિપત્ર બહાર પાડવામાં આવ્યો છે. આ સત્તાવાર આદેશ અનુસાર, રાજ્યભરના પોલીસ અધિકારીઓ અને કર્મચારીઓની તમામ પ્રકારની રજાઓ તાત્કાલિક અસરથી રદ કરી દેવામાં આવી છે. તહેવારો દરમિયાન રાજ્યમાં કોઈ અનિચ્છનીય ઘટના ન બને તે માટે આ કડક પગલું ભરવામાં આવ્યું છે.

10થી 17 જુલાઈ સુધી રજાઓ પર સંપૂર્ણ પ્રતિબંધ

પોલીસ વડાની કચેરી દ્વારા જાહેર કરાયેલા આદેશ મુજબ, આગામી 10 જુલાઈથી લઈને 17 જુલાઈ સુધીના સમયગાળા દરમિયાન રાજ્યના કોઈ પણ પોલીસ કર્મચારીને રજા મળશે નહીં. આ આઠ દિવસ સુધી તમામ રજાઓ પર સંપૂર્ણ પ્રતિબંધ મૂકવામાં આવ્યો છે. જો કે, આદેશમાં એ સ્પષ્ટતા પણ કરવામાં આવી છે કે જો કોઈ કર્મચારીને અત્યંત ખાસ કે અનિવાર્ય સંજોગો અથવા કોઈ મેડિકલ ઈમરજન્સી ઊભી થાય, તો જ સક્ષમ અધિકારીની વિશેષ મંજૂરી બાદ જ રજા મંજૂર કરી શકાશે. સામાન્ય સંજોગોમાં કોઈપણ પોલીસકર્મી ફરજ પરથી ગેરહાજર રહી શકશે નહીં.

રથયાત્રાની સુરક્ષા વ્યવસ્થાને આખરી ઓપ

ગુજરાતમાં, ખાસ કરીને અમદાવાદ, ભાવનગર અને અન્ય શહેરોમાં નીકળનારી રથયાત્રાઓમાં લાખોની સંખ્યામાં શ્રદ્ધાળુઓ ઉમટી પડતા હોય છે. આટલી વિશાળ જનમેદની વચ્ચે શાંતિ, સલામતી અને કોમી સૌહાર્દ જળવાઈ રહે તે માટે પોલીસનું સતત હાજર રહેવું અનિવાર્ય છે. રજાઓ રદ થવાના કારણે હવે રાજ્યના તમામ પોલીસ સ્ટેશનો અને પ્રશાસનમાં 100 ટકા સ્ટાફ હાજર રહેશે, જેનાથી બંદોબસ્તની કામગીરી વધુ મજબૂત બનશે. રથયાત્રાના રૂટ પર લોખંડી પોલીસ બંદોબસ્ત ગોઠવવાની અને કાયદો-વ્યવસ્થા જાળવવાની તૈયારીઓને અત્યારથી જ આખરી ઓપ આપવામાં આવી રહ્યો છે.

ગુજરાતના વધુ સમાચાર વાંચવા માટે ક્લિક કરો