Gujarat News: બોટાદના MLA ઉમેશ મકવાણાએ કારખાના સુધારા વિધેયક બિલની કોપી ફાડી

ગુજરાતમાં વિધાનસભાના ચોમાસુ સત્રના છેલ્લા દિવસે કારખાના (ગુજરાત સુધારા) વિધેયક 2025 પસાર કરવામાં આવ્યું હતું. આ વિધેયક પસાર કરવા દરમિયાન ઉગ્ર ચર્ચા થઈ હતી. ગૃહમાં ચર્ચા દરમિયાન બોટાદના ધારાસભ્ય ઉમેશ મકવાણાએ બિલ અંગે પોતાનું સંબોધન પૂર્ણ કરતા બિલની કોપી ફાડી નાખી હતી. તેમણે આ બિલને લઈને વિરોધ વ્યક્ત કર્યો હતો. તેમણે અધ્યક્ષ જેઠા ભરવાડે ઠપકો પણ આપ્યો હતો.

સંબોધનને પૂર્ણ કરતાં જ આ બિલની કોપી ફાડી નાંખી

ગુજરાત કારખાના સુધારા વિધેયક પર બોટાદના ધારાસભ્ય ઉમેશ મકવાણાએ વિરોધ વ્યક્ત કર્યો હતો. તેમણે આ બિલને લઈને ગૃહમાં કહ્યું હતું કે, પ્રાઈવેટ સેક્ટરમાં અનામત લાગુ કરવામાં આવે. કામદારોને આઠ કલાકની જગ્યાએ 12 કલાક કામની મંજૂરી આપવામાં આવી છે તો ધારાસભ્યોએ પણ 12 કલાક કામ કરવું જોઈએ. તેમણે પોતાના સંબોધનને પૂર્ણ કરતાં જ આ બિલની કોપી ફાડી નાંખી હતી. જેથી તેમને આ બાબતે ઠપકો પણ આપ્યો હતો.

ગોપાલ ઈટાલિયા અને કાંતિ અમૃતિયા વચ્ચે તડાફડી

ઉમેશ મકવાણાની વાત પર ભાજપના પોરબંદરના ધારાસભ્ય અર્જુન મોઢવાડિયાએ કહ્યું હતું કે, જે કામ કરે નહીં તે ચૂંટાય જ નહીં. ધારાસભ્યોના કામના કોઈ કલાક હોતા નથી. આ દરમિયાન વિસાવદરના ધારાસભ્ય ગોપાલ ઈટાલિયાના સંબોધન દરમિયાન મોરબીના ધારાસભ્ય કાંતિ અમૃતિયા અકળાઈને ઉભા થઈ જતાં બંને વચ્ચે તડાફડી જોવા મળી હતી. ઓવરટાઈમ અંગે ગોપાલ ઈટાલિયાએ કહ્યું હતું કે, સરકારને ઓવરટાઇમ આપવામાં રસ હોય તો પોલીસને આપો.