Gujarat News: દમણ નપા અને જિલ્લા પંચાયતમાં ભાજપનો દબદબો

સંઘ પ્રદેશ દમણમાં યોજાયેલી સ્થાનિક સ્વરાજ્યની ચૂંટણીના મતદાન પહેલા જ ભાજપનો ભગવો લહેરાયો છે. દમણ નગર પાલિકા અને જિલ્લા પંચાયતની ચૂંટણી પહેલા જ ભાજપની ભવ્ય જીત થઈ છે. બંને પંચાયતોમાં ચૂંટણી યોજાય તે પહેલા જ ભાજપે મહત્વની બેઠકો કબજે કરી છે.દમણ, દીવ અને દાદરા નગર હવેલી પ્રદેશ અધ્યક્ષે માહિતી આપતાં કહ્યું હતું કે, સંઘ પ્રદેશની સ્થાનિક સ્વરાજ્યની ચૂંટણી આગામી નવેમ્બર માસમાં યોજાશે.

દમણ નપા અને જિલ્લા પંચાયતમાં 5 નવેમ્બરે મતદાન થશે

આ ચૂંટણી યોજાય તે પહેલા જ દમણ નગર પાલિકામાં 15 વોર્ડમાં ભાજપના 12 ઉમેદવારો બિન હરીફ જીત્યાં છે.જ્યારે જિલ્લા પંચાયતની ચૂંટણીના મતદાન પહેલા જ 16માંથી 10 બેઠકો પર ભાજપના ઉમેદવારો બિન હરીફ જીતી ગયા છે. હવે દમણ નગર પાલિકાના ત્રણ વોર્ડ અને જિલ્લા પંચાયતમાં 6 બેઠકો માટે ચૂંટણી યોજાશે. આગામી પાંચ નવેમ્બરે ચૂંટણીનું મતદાન યોજાશે. આ ચૂંટણી પહેલા જ ભાજપે મોટાભાગની બેઠકો પર બિન હરીફ જીત મેળવીને કબજો મેળવી લીધો છે. ઉલ્લેખનીય છે કે, અગાઉ ભાજપના સભ્યો સિવાયના ઉમેદવારોના ફોર્મ રદ કરવામાં આવતા રાજકારણ ગરમાયું હતું.