Gujarat રાજ્યમાં વાદળછાયા વાતાવરણ વચ્ચે હળવાં ઝાપટાંની શક્યતા, માછીમારોને દરિયો ન ખેડવા સૂચના

ગુજરાતમાં હવામાન વિભાગની આગાહી મુજબ આગામી દિવસોમાં રાજ્યભરમાં વરસાદી ઝાપટાંની સ્થિતિ જળવાઈ રહેશે. અરબી સમુદ્ર પરથી આવતા પશ્ચિમી પવનોમાં પુષ્કળ ભેજ હોવા સાથે સાયક્લોનિક સર્ક્યુલેશન અને વેસ્ટર્ન ડિસ્ટર્બન્સ સક્રિય થતાં સમગ્ર રાજ્યમાં વાદળછાયું વાતાવરણ બનેલું છે. જોકે, હાલની સ્થિતિએ મુસળધાર કે અતિભારે વરસાદની શક્યતાઓ નહિવત છે. દરીયાઈ પટ્ટા પર પવનની ઝડપ 40થી 50 કિલોમીટર પ્રતિ કલાક રહેવાની શક્યતા હોવાથી તંત્ર દ્વારા માછીમારોને દરિયો ન ખેડવા માટે સ્પષ્ટ સૂચના આપવામાં આવી છે. 

ઉત્તર, દક્ષિણ અને મધ્ય ગુજરાતના વિસ્તારોમાં આગાહી

રાજ્યના વિવિધ પ્રદેશોમાં વરસાદનું પ્રમાણ હળવાથી મધ્યમ રહેવાનો અંદાજ છે. ઉત્તર ગુજરાતના વિસ્તારોમાં પવન અને ગાજવીજ સાથે હળવાંથી મધ્યમ વરસાદી ઝાપટાં પડી શકે છે. જ્યારે દક્ષિણ અને મધ્ય ગુજરાતના મોટા ભાગના જિલ્લાઓમાં સામાન્ય વરસાદી માહોલ જળવાઈ રહેશે. અમદાવાદ શહેરમાં પણ વાદળછાયા વાતાવરણ વચ્ચે દિવસ દરમિયાન હળવા વરસાદી ઝાપટાં પડવાની પૂરતી સંભાવનાઓ વ્યક્ત કરવામાં આવી છે. આ ઝાપટાંના કારણે લોકોને બફારા અને ગરમીમાંથી આંશિક રાહત અનુભવાશે.

સૌરાષ્ટ્ર અને કચ્છ પ્રદેશમાં હળવા ઝાપટાંની સંભાવના

સૌરાષ્ટ્ર અને કચ્છ વિસ્તારમાં પણ મુખ્યત્વે સામાન્ય અને હળવા વરસાદની જ શક્યતા દર્શાવાઈ છે. કચ્છ, મોરબી, સુરેન્દ્રનગર, રાજકોટ, જામનગર અને દેવભૂમિ દ્વારકા જેવા જિલ્લાઓમાં છૂટાછવાયાં વરસાદી ઝાપટાં પડી શકે છે. આ ઉપરાંત જૂનાગઢ, અમરેલી, ગીર સોમનાથ, ભાવનગર અને બોટાદ જિલ્લામાં હળવો વરસાદ રહેવાની સંભાવના છે. ભારે વરસાદની ગેરહાજરી વચ્ચે પડતાં આ ઝાપટાંથી ખેતીના પાકને અનુકૂળ ભેજ મળી રહેશે અને તાપમાનમાં પણ સાધારણ ઘટાડો નોંધાશે. 

ગુજરાતના વધુ સમાચાર વાંચવા માટે ક્લિક કરો