Godhra:કન્ટેનરમાંથી રૂપિયા 25.66 લાખનો વિદેશી દારૂ ઝડપાયો

ગોધરા તાલુકાના વણાકપુર ગામે બાયપાસ હાઇવે ઉપર જિલ્લા એલસીબી પોલીસે નાકાબંધી કરી કન્ટેનરમાં વેક્યુમ ક્લિનરની આડમાં લઈ જવાતો રૂા.25,66,560નો વિદેશી દારૂ ઝડપી પાડી કન્ટેનર સહિત કુલ રૂા.52,21,675ના મુદામાલ સાથે ડ્રાઈવરને ઝડપી પાડયો હતો.

ગોધરા એલસીબી પો.ઈ એન.એલ. દેસાઈએે સ્ટાફને દારૂની હેરાફેરી કરતા ઈસમો ઉપર વોચ રાખી રેઇડ કરવાની સૂચના આપી હતી, જે મુજબ એલસીબી પી.એસ.આઈ એસ.આર.શર્માને મળેલી બાતમીના આધારે ટીમે વણાકપુર બાયપાસ હાઈવે પર વોચ ગોઠવી વાહનોની તલાશી હાથ ધરી હતી. દરમિયાન એક કન્ટેનર દાહોદ તરફથી આવતાં તેને રોકી તેમાં તપાસ કરતા તેમાં વેક્યુમ ક્લિનર લઈ જવાતા હોવાનું જણાયું હતું. પોલીસે તેને ખસેડીને તપાસ કરતાં તેના નીચે મુકેલા ખોખામાં વિદેશી દારૂ મળી આવ્યો હતો, એલસીબી પોલીસે કુલ રૂા.25,66,560 નો વિદેશી દારૂ તેમજ રૂા.10 લાખની કન્ટેનર ટ્રક અને રૂા.16,50,115ના 528 વેક્યુમ ક્લીનર મળી કુલ રૂા.52,21,675 ના મુદામાલ સાથે ડ્રાઈવર હરિયાણાના તાવડુ તાલુકાના બાવલા ગામના મુનફેદ ઈશેખાન મેવને ઝડપી પાડી આ સંબંધે ગોધરા તાલુકા પોલીસ મથકે ગુનો દાખલ કરાવી આગળની કાર્યવાહી હાથ ધરી હતી.