Gandhinagar News : ભાજપ માટે ચૂંટણી પ્રજા વચ્ચે જવાનો અવસર, શહેર ભાજપ અધ્યક્ષ આશિષ દવેનું મોટું નિવેદન

ગાંધીનગર મહાનગરપાલિકા (GMC) ની આગામી ચૂંટણી માટે ભારતીય જનતા પાર્ટીએ પોતાની ઉમેદવારી પ્રક્રિયા પૂર્ણ કરી લીધી છે. પક્ષ દ્વારા તમામ 44 બેઠકો પર સત્તાવાર ઉમેદવારોના ફોર્મ ભરી દેવામાં આવ્યા છે. કોઈપણ પ્રકારની ટેકનિકલ ખામી કે કાનૂની અડચણથી બચવા માટે ભાજપે તમામ બેઠકો પર ડમી ઉમેદવારો પણ ઉભા રાખ્યા છે. આમ, ભાજપ દ્વારા સત્તાવાર રીતે કુલ 88 ઉમેદવારી પત્રો દાખલ કરવામાં આવ્યા છે, જેના કારણે ચૂંટણી માહોલમાં પક્ષની સંગઠનાત્મક શક્તિ અને સંપૂર્ણ તૈયારીઓ સ્પષ્ટપણે જોઈ શકાય છે.

શહેર ભાજપ પ્રમુખ આશિષ દવેનું નિવેદન

ઉમેદવારી ફોર્મ ભરાયા બાદ શહેર ભાજપ અધ્યક્ષ આશિષ દવેએ પક્ષના કાર્યકરો અને વ્યૂહરચના અંગે મહત્વનું નિવેદન આપ્યું હતું. તેમણે જણાવ્યું હતું કે, ભાજપનો દરેક કાર્યકર સતત લોકોની વચ્ચે રહીને લોકસેવાના કાર્યો કરે છે. ભાજપ માટે ચૂંટણી એ માત્ર સત્તા મેળવવાનું સાધન નથી પરંતુ ફરી એકવાર પ્રજાની વચ્ચે જઈને તેમના આશીર્વાદ મેળવવાનો ઉત્સવ છે. તાજેતરની ચૂંટણીઓમાં પણ જનતાએ ભાજપને પ્રચંડ બહુમતી આપી છે અને ગાંધીનગરના નગરજનોના સુખાકારીમાં સતત વધારો થાય તેવા વિકાસકાર્યો પક્ષે કર્યા છે.

તમામ બેઠકો પર જીતનો દાવો - આશિષ દવે

ગાંધીનગરની કેટલીક બેઠકો બિનહરીફ થવા અંગે પૂછાયેલા પ્રશ્નના જવાબમાં આશિષ દવેએ સ્પષ્ટતા કરતા કહ્યું હતું કે, "અમે અન્ય પક્ષો શું કરે છે કે તેમની શું સ્થિતિ છે તે જોતા નથી, ચૂંટણી આયોગ તમને આ અંગે યોગ્ય અને સત્તાવાર માહિતી આપશે." તેમણે પૂર્ણ આત્મવિશ્વાસ વ્યક્ત કર્યો હતો કે ભાજપના પ્રતીક 'કમળ' પર ચૂંટણી લડી રહેલા તમામ 44 ઉમેદવારો પ્રચંડ બહુમતી સાથે વિજય મેળવશે અને ગાંધીનગર મનપામાં ફરી એકવાર ભાજપનું બોર્ડ બનશે.

આ પણ વાંચો : Surat News : દિવાળી વેકેશનમાં રત્નકલાકારોને મળશે રાહત? ST બસોમાં સવાયાને બદલે સિંગલ ભાડું વસૂલવા SDA ની માંગ