Dwarka News: જામ ખંભાળીયામાં લંપી વાયરસની દસ્ક્ત, પશુઓમાં લક્ષણો જણાતા પશુપાલકોમાં ભારે ચિંતા!

દેવભૂમિ દ્વારકા જિલ્લાના જામ ખંભાળીયા વિસ્તારમાંથી પશુપાલકો માટે ચિંતાજનક સમાચાર સામે આવ્યા છે. જામ ખંભાળીયામાં ફરી એકવાર જીવલેણ લંપી વાયરસની એન્ટ્રી થતાં પશુપાલકો અને પશુપ્રેમીઓમાં ચિંતાનું મોજું ફરી વળ્યું છે. વાયરસના પગલે તંત્ર પણ ત્વરિત હરકતમાં આવ્યું છે.

ઘી ડેમ વિસ્તારમાં 3 પશુઓમાં દેખાયા વાયરસના લક્ષણો

મળતી માહિતી મુજબ, જામ ખંભાળીયાના ઘી ડેમ વિસ્તારમાં આવેલા કેટલાક પશુઓમાં લંપી વાયરસના શંકાસ્પદ લક્ષણો જોવા મળ્યા છે. પ્રાથમિક તપાસમાં અત્રેના 3 પશુઓમાં આ સંક્રમણના લક્ષણો જણાતા સ્થાનિક સ્તરે દોડધામ મચી ગઈ છે.

પશુ વિભાગનું એલર્ટ, સારવાર અને સેમ્પલ કલેક્શનની કામગીરી

પશુઓમાં લંપી વાયરસ ફરીથી દેખા દેતાની સાથે જ પશુપાલન વિભાગ તાત્કાલિક એલર્ટ થઈ ગયો છે. વિભાગની ટીમો દ્વારા બિમાર પશુઓને ત્વરિત સારવાર આપવામાં આવી રહી છે. તેમજ વાયરસની પુષ્ટિ માટે સંક્રમિત પશુઓના જરૂરી સેમ્પલ પણ લેવામાં આવ્યા છે, જેથી રોગચાળો આગળ વધતો અટકાવી શકાય.

જામ ખંભાળીયા તાલુકામાં તાત્કાલિક સર્વે હાથ ધરાયો

પરિસ્થિતિની ગંભીરતાને ધ્યાનમાં રાખીને પશુ વિભાગ દ્વારા જામ ખંભાળીયા તાલુકાભરમાં તાત્કાલિક ધોરણે સર્વેની કામગીરી શરૂ કરવામાં આવી છે. અન્ય પશુઓમાં ચેપ ફેલાયો છે કે નહીં તેની ચકાસણી માટે ડોક્ટરોની ટીમો ઘરે-ઘરે અને વાડાઓમાં તપાસ ચલાવી રહી છે.

રખડતા પશુઓમાં વાયરસથી પશુપ્રેમીઓમાં ચિંતા

ખાસ કરીને રખડતા અને નિરાધાર પશુઓમાં ફરીથી લંપી વાયરસનું સંક્રમણ વ્યાપક બનતા પશુપ્રેમીઓમાં ચિંતાની લાગણી છવાઈ ગઈ છે. જો સમયસર યોગ્ય રસીકરણ અને કાળજી નહીં લેવાય, તો આ બીમારી ફરી મોટું સ્વરૂપ ધારણ કરી શકે છે, જેને લઈને પશુપાલકો દ્વારા તંત્ર પાસે વહેલી તકે સઘન રસીકરણ અભિયાન ચલાવવાની માગ કરવામાં આવી રહી છે.

આ પણ વાંચો: Jam Khambhaliaના વોર્ડ નં-2 માં પીવાના પાણી મુદ્દે મહિલાઓ રણચંડી બની, 10થી 12 દિવસે પાણી મળતાં ભારે આક્રોશ!