Dangના વાતાવરણમાં આવ્યો પલટો: આહવા અને સુબીર પંથકમાં કમોસમી વરસાદી ઝાપટાં

ડાંગ જિલ્લામાં આજે સવારથી જ આકાશમાં વાદળછાયું વાતાવરણ જોવા મળ્યું હતું. બપોર બાદ જિલ્લાના મુખ્ય મથક આહવા અને તેની આજુબાજુના ગ્રામ્ય વિસ્તારોમાં અચાનક કમોસમી વરસાદી ઝાપટાં પડ્યા હતા. ધોમધખતી ગરમી અને અસહ્ય બફારા વચ્ચે મેઘરાજાના આગમનથી સમગ્ર પંથકમાં શીતલ લહેર દોડી ગઈ છે અને સ્થાનિકોને ગરમીથી મોટી રાહત મળી છે.

આહવા અને સુબીર પંથકમાં અમીછાંટણા

વરસાદની અસર માત્ર આહવા પૂરતી સીમિત ન રહેતા, સુબીર અને તેની આસપાસના અંતરિયાળ ગ્રામ્ય વિસ્તારોમાં પણ જોવા મળી હતી. આ વિસ્તારોમાં હળવા વરસાદી છાંટા પડ્યા હોવાના અહેવાલો પ્રાપ્ત થયા છે. કમોસમી વરસાદને કારણે માર્ગો પર ભીનાશ જોવા મળી હતી અને પર્વતીય વિસ્તાર હોવાથી ધુમ્મસિયા વાતાવરણ જેવો માહોલ સર્જાયો હતો.

ખેડૂતોમાં ચિંતા, પ્રવાસીઓમાં આનંદનો માહોલ

એક તરફ વરસાદને કારણે વાતાવરણ ખુશનુમા બનતા પ્રવાસીઓમાં આનંદ જોવા મળ્યો છે, તો બીજી તરફ આ માવઠાને કારણે ખેતીના પાકને નુકસાન થવાની ભીતિથી ખેડૂતોમાં ચિંતા ફેલાઈ છે. હવામાન વિભાગની આગાહી મુજબ હજુ પણ આગામી થોડા કલાકો સુધી વાદળછાયું વાતાવરણ રહી શકે છે.

ગુજરાતના વધુ સમાચાર વાંચવા માટે ક્લિક કરો