Dang News: વરસાદને કારણે સાપુતારાના ઘાટીમાર્ગમાં ભેખડ ધસી પડી, રસ્તા પર પથ્થરો પડતાં વાહનચાલકોને મુશ્કેલી

ગુજરાતમાં ચોમાસાની સિઝનમાં ડાંગ જિલ્લામાં પ્રવાસીઓનો વધારે ઘસારો જોવા મળતો હોય છે. જિલ્લામાં વરસાદમાં ધોધ અને ઝરણાં સક્રિય થતાં પ્રવાસીઓની ભીડ જામે છે. બીજી તરફ સાપુતારા ખાતે મોન્સૂન ફેસ્ટિવલ ચાલતો હોવાથી પ્રવાસીઓ મોટી સંખ્યામાં ઉમટી પડ્યા હતાં. આ દરમિયાન સાપુતારામાં ઘાટીમાર્ગમાં વરસાદને કારણે ભેખડ ધસી પડી હતી. રસ્તા પર પથ્થરો પડતાં રસ્તો બંધ થયો હતો.

ઝીરો વિઝિબિલિટિને કારણે વાહન ચાલકો પરેશાન

ડાંગ જિલ્લાના સાપુતારામાં ઘાટીમાર્ગમાં ભારે વરસાદને કારણે ભેખડો ધસી પડી હતી. રસ્તા પર પથ્થરો પડતાં વાહન ચાલકો મુશ્કેલીમાં મુકાયા હતાં. જેના કારણે થોડા સમય સુધી રસ્તો બંધ કરવાની ફરજ પડી હતી. તંત્ર દ્વારા પથ્થરો હટાવી રસ્તો ફરી કાર્યરત કરવાની કામગીરી શરૂ કરવામાં આવી હતી. સદનસીબે આ ઘટનામાં કોઈ જાનહાનીની વિગતો પ્રાપ્ત થઈ નથી. સાપુતારામાં મોન્સૂન ફેસ્ટિવલના અંતિમ પડાવમાં પ્રવાસીઓની ભીડ જામી છે. રસ્તાઓ પર ટ્રાફિક જામની પણ સ્થિતિ જોવા મળી છે. વરસાદને કારણે ઝીરો વિઝિબિલિટિને કારણે વાહન ચાલકો પરેશાન થયા હતા.

વરસાદને કારણે સાપુતારામાં ખુશનુમા વાતાવરણ

ડાંગ જિલ્લામાં લાંબા સમય બાદ ફરીવાર વરસાદ શરૂ થયો હતો. વરસાદને કારણે સાપુતારામાં ખુશનુમા વાતાવરણ જોવા મળ્યું હતું. બીજી તરફ ડાંગ જિલ્લાના જોવાલાયક સ્થળો, નદી, તળાવ, ધોધ, ચેકડેમ વિગેરે સ્થળોએ કોઈ પણ વ્યકિતઓ કે પ્રવાસીઓ જળાશયોમાં ન પ્રવેશે તે માટે ભારતીય નાગરીક સુરક્ષા સંહિતા-૨૦૨૩ ની કલમ-૧૬૩ મુજબ પ્રતિબંધ ફરમાવતું જાહેરનામું અધિક જિલ્લા મેજિસ્ટ્રેટ વી.કે.જોશીએ પ્રસિધ્ધ કર્યુ છે.