Dahod:MPનાં વેપારી અને તેની માતાને તમંચો બતાવી રૂા.1.30 લાખની મતાની લૂંટ

મધ્યપ્રદેશના રંભાપુર ખાતેના પોતાના ઘરેથી બાઈક પર દાહોદ નાયક હોસ્પિટલ ખાતે માતા સાથે આવી રહેલા યુવાન વેપારીની બાઈક રોકી બાઈક પર આવેલા ત્રણ લુંટારુઓએ તમંચો બતાવી વેપારીની માતાએ પહેરેલા સોનાના દાગીના અને વેપારી પાસેથી રોકડ મળી કુલ રૂા.1,30,500ની મત્તાની લૂંટ કરી ત્રિપુટી ફરાર થઈ ગઈ હતી.

ઝાબુઆ જિલ્લાના મેઘનગર તાલુકાના રંભાપુર ગામે રહેતા 33 વર્ષીય વેપારી મહેશભાઈ રૂપસિંગ સાબલીયા માતા સાથે બાઈક પર ગઈકાલે બપોરે દાહોદ નાયક હોસ્પિટલ ખાતે આવવા નીકળ્યા હતા. ત્યારે રસ્તામાં દાહોદ તાલુકાના જુનાપાણી ગામની પાણીની ટાંકી પાસે સ્પોર્ટ્સ બાઈક પર પાછળથી આવેલા 3 અજાણ્યા ઈસમોએ તેમની બાઈકને ઉભી રખાવી મહેશભાઈ તથા તેમની માતાને તમંચા જેવું હથિયાર બતાવી માતાના ગળામાંથી અઢી તોલાનો સોનાનો દોરો તથા બંને કાનની સોનાની બુટ્ટીઓ તેમજ મહેશભાઈના પર્સમાંથી રૂા. 2500ની રોકડ તથા આધારકાર્ડ, પાનકાર્ડ તથા ડ્રાઇવિંગ લાઇસન્સની ઝેરોક્ષ મળી કુલ રૂા.1,30,500ની મત્તા લૂંટી લૂંટારુઓ ફરાર થઈ ગયા હતા. આ સંબંધે લૂંટનો ભોગ બનેલા મહેશભાઈ રૂપસિંગઈ સાબલિયાએ કતવારા પોલીસ સ્ટેશનમાં ફરિયાદ નોંધાવતા પોલીસે ગુનો નોંધી લુંટારૂઓની શોધખોળ હાથ ધરી છે.