Bhavnagar News: મહુવાના કંટાસર ગામે દીપડાનો આતંક; વાડીમાં રમતી 5 વર્ષની માસૂમ બાળકીને ફાડી ખાધી!

ભાવનગર જિલ્લાના મહુવા તાલુકાના કંટાસર ગામમાંથી એક અત્યંત કાળજું કંપાવી દેનારી અને અરેરાટીભરી ઘટના સામે આવી છે. અહીં સીમ વિસ્તારમાં આવેલી વાડીમાં રમી રહેલી એક 5 વર્ષની માસૂમ બાળકી પર હિંસક દીપડાએ જીવલેણ હુમલો કર્યો હતો. દીપડો બાળકીને ઉઠાવીને સીમમાં ભાગી ગયો હતો અને તેને ફાડી ખાધી હતી. આ ગમખ્વાર ઘટનાને પગલે સમગ્ર પંથકના શ્રમિકો અને ગ્રામજનોમાં ભારે ભય અને શોકનો માહોલ વ્યાપી ગયો છે.

વાડીમાં રમતી દિવ્યાને દીપડો ઉઠાવી ગયો

કંટાસર ગામની સીમમાં આવેલી વાડીમાં શ્રમિક પરિવારની 5 વર્ષની માસૂમ દીકરી દિવ્યા ગોહિલ અન્ય બાળકો સાથે રમી રહી હતી. આ દરમિયાન અચાનક નજીકની ઝાડીઓમાંથી ધસી આવેલા એક માનવભક્ષી દીપડાએ દિવ્યા પર હુમલો કરી દીધો હતો અને તેને મોઢામાં દબાવીને અંધારા તરફ ભાગી છૂટ્યો હતો. બાળકીની ચીસાચીસ સાંભળીને પરિવારજનો અને આસપાસના લોકો તાત્કાલિક દોડી આવ્યા હતા અને હથિયારો સાથે સીમમાં શોધખોળ આદરી હતી. ભારે શોધખોળ બાદ નજીકના વગડામાંથી માસૂમ દિવ્યાનો લોહીલુહાણ હાલતમાં મૃતદેહ મળી આવતાં પરિવાર પર આભ તૂટી પડ્યું હતું.

દીપડાને પકડવા વન વિભાગ દ્વારા પાંજરા ગોઠવાયા

માસૂમ બાળકીના શિકારની આ ઘટનાથી સ્થાનિક લોકોમાં વન વિભાગ સામે ભારે આક્રોશ ફાટી નીકળ્યો છે. ઘટનાની જાણ થતાં જ વન વિભાગની ઉચ્ચ અધિકારીઓ સહિતની ટીમ તાત્કાલિક કંટાસર ગામે દોડી આવી હતી. વન વિભાગે ઘટનાની ગંભીરતાને જોઈને આ માનવભક્ષી દીપડાને વહેલી તકે પાંજરે પૂરવા માટે ગામની સીમમાં અલગ-અલગ જગ્યાએ પાંજરા ગોઠવી દીધા છે. સાથોસાથ દીપડાના લોકેશનને ટ્રેક કરવા માટે વનકર્મીઓ દ્વારા ખાસ સર્ચ ઓપરેશન શરૂ કરવામાં આવ્યું છે, જેથી અન્ય કોઈ વ્યક્તિ કે બાળક તેનો ભોગ ન બને.

ગુજરાતના વધુ સમાચાર વાંચવા માટે ક્લિક કરો