Bharuch News: અંકલેશ્વરમાં SMCએ કંપનીમાંથી સળિયા સગેવગે કરવાનું કૌભાંડ ઝડપ્યું, 17 વાહનો સહિત 1.17 કરોડનો મુદ્દામાલ જપ્ત

ગુજરાતમાં દારુ અને જુગારની પ્રવૃત્તિઓ પર મોટાભાગે સ્ટેટ મોનિટરિંગ સેલની રેડ પડતી હોવાના બનાવો સામે આવતા હોય છે. પરંતુ અંકલેશ્વરમાં એક કંપનીમાં લોખંડના સળિયા સગેવગે કરવાનું કૌભાંડ સ્ટેટ મોનિટરિંગ સેલની ટીમે ઝડપી પાડ્યું છે. પોલીસે 11 આરોપીઓની ધરપકડ કરીને 1.17 કરોડની કિંમતનો મુદ્દામાલ જપ્ત કર્યો છે.

કંપનીમાંથી સળિયા સગેવગે કરવાનું કૌભાંડ ઝડપી પાડ્યું

પ્રાપ્ત વિગતો પ્રમાણે અંકલેશ્વરની એક કંપનીમાંથી લોખંડના સળિયા જેતે ડિલરોને મોકલવા માટે રવાના કરતા હતાં પણ આ સળિયા તેના નિર્ધારિત સ્થળ પર પહોંચતા નહોતા. રસ્તામાં જ આ સળિયા સગેવગે કરી દેવામાં આવતા હતાં. આ સમગ્ર ઘટનાની બાતમી મળતાં જ સ્ટેટ મોનિટરિંગ સેલની ટીમ એક્ટિવ થઈ ગઈ હતી અને કંપનીમાંથી સળિયા સગેવગે કરવાનું કૌભાંડ ઝડપી પાડ્યું હતું.

રેડ દરમિયાન 37 લાખના સળિયા પણ જપ્ત કર્યા

સ્ટેટ મોનિટરિંગ સેલની ટીમ દ્વારા અંકલેશ્વરની એક કંપનીમાં દરોડા પાડવામાં આવ્યા હતાં. જેમાં કંપનીમાંથી જે તે જગ્યાએ મોકલવામાં આવતા સળિયા બારોબાર સગેવગે થઈ જતાં હોવાનું કૌભાંડ પકડાયું હતું. પોલીસે દરોડા દરમિયાન 11 આરોપીઓની ધરપકડ કરી છે. આ ઉપરાંત 70 વાહનો મળીને 1.17 કરોડનો મુદ્દામાલ જપ્ત કર્યો છે. પોલીસે આ રેડ દરમિયાન 37 લાખના સળિયા પણ જપ્ત કર્યા છે.