Banaskantha: વાવ-થરાદ પંથકમાં વાતાવરણમાં અચાનક પલટો, વહેલી સવારથી કાળા ડિબાંગ વાદળો છવાતાં ખેડૂતોમાં ચિંતા

બનાસકાંઠા જિલ્લાના સરહદી વિસ્તારોમાં વહેલી સવારથી જ વાવ અને થરાદ પંથક સહિત બનાસકાંઠા જિલ્લાના હવામાનમાં અચાનક પલટો જોવા મળ્યો છે. કાળઝાળ ગરમી વચ્ચે સવારથી જ સૂર્યનારાયણ કાળા ડિબાંગ વાદળોની ઓથમાં છુપાઈ ગયા છે અને ચોમાસા જેવો માહોલ સર્જાયો છે. આ અણધાર્યા વાદળછાયા વાતાવરણના કારણે જિલ્લાના ખેડૂતોમાં ભારે ચિંતા વ્યાપી ગઈ છે.

બાજરી અને મગફળીના પાક પર મોટો ખતરો

સ્થાનિક અહેવાલો અનુસાર, હાલમાં બનાસકાંઠાના મોટાભાગના વિસ્તારોમાં ખેડૂતોનો બાજરી અને મગફળીનો પાક તૈયાર થઈ ગયો છે અથવા લણણીની પ્રક્રિયામાં છે. ખેડૂતોએ રાત-દિવસ એક કરીને પકવેલો પાક ખેતરોમાં તૈયાર પડ્યો છે, ત્યારે જ આકાશમાં કાળા વાદળો ઘેરાયા છે. જો આગામી કલાકોમાં વાવાઝોડા સાથે કમોસમી વરસાદ કે માવઠું પડશે, તો તૈયાર પાક સંપૂર્ણપણે ધોવાઈ જશે અને ખેડૂતોના મોં સુધી આવેલો કોળિયો છીનવાઈ જવાની ભીતિ સેવાઈ રહી છે. ખાસ કરીને વાવ, થરાદ અને ધાનેરાના પંથકમાં આ ચિંતા વધુ ઘેરી બની છે.

સમગ્ર બનાસકાંઠામાં મિશ્ર વાતાવરણ

માત્ર વાવ-થરાદ જ નહીં, પરંતુ જિલ્લાના મુખ્ય મથક પાલનપુર, વેપારી મથક ડીસા, દાંતીવાડા, ધાનેરા તેમજ કાંકરેજ પંથકમાં પણ વહેલી સવારથી જ ઠંડો પવન ફૂંકાવાની સાથે વાદળછાયું વાતાવરણ જોવા મળી રહ્યું છે. વાતાવરણમાં આવેલા આ પલટાના કારણે ગરમીથી લોકોને આંશિક રાહત મળી છે, પરંતુ જગતનો તાત આકાશ તરફ નજર માંડીને બેઠો છે કે મેઘરાજા શાંત રહે. બીજી તરફ, હવામાનના આ પલટાને પગલે જિલ્લાના વિવિધ એપીએમસી (APMC) માર્કેટ યાર્ડ દ્વારા પણ ખેડૂતોને તેમનો અનાજનો જથ્થો સુરક્ષિત જગ્યાએ રાખવા અને તાડપત્રી ઢાંકીને રાખવા માટે સૂચનાઓ આપવામાં આવી રહી છે.

આ પણ વાંચો: Ahmedabad: જલારામ અંડરપાસમાંથી પસાર થતાં પહેલાં દસ વાર વિચારજો, 90 કરોડનો પ્રોજેક્ટ બન્યો જોખમી