Amreli News: ખાંભામાં એક જ જ્ઞાતિના બે જૂથ સામ સામે, લોહિયાળ અથડામણમાં એકની હત્યા

દિવાળી પર્વની મોડી રાત્રે ખાંભાના ભગતવી પરા વિસ્તારમાં બે જૂથ સામસામે આવી જતાં ભારે અફરાતફરી મચી ગઈ હતી.બંને જૂથ વચ્ચે અગાઉથી ચાલ્યા આવતા મનદુઃખના કારણે મામલો બિચક્યો હતો અને સામાન્ય બોલાચાલી જોતજોતામાં હિંસક મારામારીમાં ફેરવાઈ ગઈ હતી.આ અથડામણ દરમિયાન બંને પક્ષે તીક્ષ્ણ હથિયારો અને છરીઓ ખુલ્લેઆમ ઉછળ્યા હતા.આ હિંસક હુમલામાં સુલતાનભાઈ દાઉદભાઈ સોલંકી પર છરી વડે ઘાતક પ્રહાર કરવામાં આવતાં તેમનું ઘટનાસ્થળે જ કમકમાટીભર્યું મોત નીપજ્યું હતું.હત્યાની આ ઘટનાથી સમગ્ર પંથકમાં ભારે ચકચાર અને ભયનો માહોલ ફેલાઈ ગયો હતો.તહેવારના દિવસે જ લોહિયાળ સંઘર્ષ થતાં સ્થાનિક લોકોમાં ભારે ગભરાટ જોવા મળ્યો હતો.

મારામારીમાં અન્ય 5થી વધુ વ્યક્તિઓ ગંભીર રીતે ઘવાયા

આ લોહિયાળ મારામારીમાં અન્ય 5થી વધુ વ્યક્તિઓ ગંભીર રીતે ઘવાયા હતા.ઘટનાને પગલે આસપાસના લોકો એકઠા થઈ ગયા હતા અને તમામ ઈજાગ્રસ્તોને તાત્કાલિક સારવાર અર્થે ખસેડવાની કામગીરી હાથ ધરવામાં આવી હતી.ઈજા પામેલા લોકોને પ્રાથમિક સારવાર માટે ખાંભા હોસ્પિટલમાં તેમજ વધુ ગંભીર ઈજાઓ ધરાવતા દર્દીઓને તાકીદે અમરેલી સરકારી હોસ્પિટલ ખાતે ખસેડવામાં આવ્યા છે.હોસ્પિટલ પરિસરમાં પણ ઈજાગ્રસ્તોના સગા-સંબંધીઓની ભીડ એકઠી થઈ જતાં વાતાવરણ ગંભીર બની ગયું હતું.તબીબો દ્વારા હાલ તમામ ઈજાગ્રસ્તોની સઘન સારવાર શરૂ કરવામાં આવી છે.

પોલીસે સ્થળ પર પહોંચીને પરિસ્થિતિ પર કાબૂ મેળવ્યો

મોડી રાત્રે બે જૂથ વચ્ચે ચાલી રહેલી મારામારી અંગે ખાંભા પોલીસને જાણ કરવામાં આવી હતી.બનાવની ગંભીરતા સમજીને ખાંભા પોલીસનો કાફલો સમયસૂચકતા દાખવીને તાત્કાલિક ઘટનાસ્થળે દોડી ગયો હતો.પોલીસે સ્થળ પર પહોંચીને પરિસ્થિતિ પર કાબૂ મેળવ્યો હતો અને મામલો શાંત પાડ્યો હતો.પોલીસની ત્વરિત અને સતર્ક કામગીરીના કારણે સ્થિતિ વધુ વણસતી અટકી હતી અને મામલો નિયંત્રણમાં આવ્યો હતો.હાલ ખાંભા પોલીસ સ્ટેશનમાં સુલતાનભાઈ સોલંકીની હત્યા તેમજ સામસામે થયેલી જીવલેણ મારામારી અંગે ગુનો નોંધવાની તજવીજ હાથ ધરવામાં આવી છે.પોલીસે સમગ્ર વિસ્તારમાં ચાંપતો બંદોબસ્ત ગોઠવીને આગળની કાયદેસરની તપાસ તેજ બનાવી છે.

આ પણ વાંચોઃ Rajkot: દિવાળીની રાત્રે શહેરમાં અનેક સ્થળોએ આગના બનાવો, ફાયર બ્રિગેડે રાતભર પાણીનો મારો ચલાવી સ્થિતિ કાબૂમાં લીધી