Ahmedabadમાં વિદેશ જવાની ઘેલછામાં મોટી છેતરપિંડી, UK વીઝા અપાવવાના નામે રૂ. 24.75 લાખનો ચૂનો ચોંટાડ્યો!

અમદાવાદ શહેરમાં વિદેશ જવાના ઘેલાડા નાગરિકોને ટાર્ગેટ કરીને લાખો રૂપિયાની છેતરપિંડી આચરવાનો વધુ એક ગંભીર કિસ્સો સામે આવ્યો છે. યુનાઇટેડ કિંગડમ (UK) ના કાયદેસરના વીઝા અપાવવાના બહાને એક નાગરિક પાસેથી રૂ. 24 લાખ 75 હજારની જંગી રકમ પડાવી લઈને ઠગાઈ આચરવામાં આવી છે. આ સમગ્ર મામલે ભોગ બનનાર દ્વારા સોલા પોલીસ સ્ટેશન ખાતે સત્તાવાર ફરિયાદ નોંધાવવામાં આવી છે.

રાજ સોની અને નિકીતા સોની સામે સોલા મથકે ફરિયાદ

પોલીસ મથકે નોંધાયેલી ફરિયાદ અનુસાર, આ આખી છેતરપિંડી પાછળ રાજ સોની અને નિકીતા સોની નામના શખસો સંકળાયેલા છે. આરોપીઓએ ફરિયાદીને યુ.કે.ના વિઝા સરળતાથી અપાવી દેવાની મોટી મોટી ગુલબાંગો ફેંકી હતી અને વિશ્વાસમાં લઈને તબક્કાવાર રીતે કુલ રૂ. 24.75 લાખ મેળવી લીધા હતા. જોકે, લાંબો સમય વિત્યા છતાં વીઝા ન મળતાં અને નાણાં પરત આપવા માટે ટાળમટોળ કરવામાં આવતાં ફરિયાદીને પોતાની સાથે છેતરપિંડી થઈ હોવાનો અહેસાસ થયો હતો.

સોલા પોલીસે હાથ ધરી તપાસ

ફરિયાદીની રજૂઆતના આધારે સોલા પોલીસ સ્ટેશને રાજ સોની અને નિકીતા સોની વિરુદ્ધ ગુનાહિત વિશ્વાસઘાત અને છેતરપિંડીની વિવિધ કલમો હેઠળ ગુનો નોંધીને કાયદેસરની તપાસ શરૂ કરી છે. પોલીસ હાલ આરોપીઓના બેંક એકાઉન્ટ્સ અને વીઝા પ્રોસેસિંગના કાગળોની ચકાસણી કરી રહી છે. અમદાવાદમાં દિન-પ્રતિદિન વધતા જતાં વીઝા ફ્રોડના કિસ્સાઓને ધ્યાને રાખીને પોલીસે નાગરિકોને માન્ય અને અધિકૃત એજન્ટો મારફતે જ કાર્યવાહી કરવા અને કોઈ પણ લોભામણી જાળમાં ન ફસાવા અપીલ કરી છે.

આ પણ વાંચો : Ambajiના માર્ગો પર અસામાજિક તત્વોનો બેફામ ત્રાસ, પાપડ વેચતા યુવક પર 15થી વધુ શખસોનો હુમલો...