Ahmedabad: લક્ઝરી બસના કારણે ઝાડની ડાળી પડતા યુવકનું મોત, પોલીસે મનુષ્ય વધનો ગુનો નોંધી કાર્યવાહી હાથ ધરી

અમદાવાદના શાહીબાગ વિસ્તારમાં એક ગંભીર અને દુઃખદ ઘટના બની છે. નમસ્તે સર્કલ પાસે એક લક્ઝરી બસના કારણે ઝાડની ડાળી પડતાં એક્ટિવા ચાલક યુવકનું ગંભીર ઇજા થવાથી મોત થયું છે. આ ઘટનાએ ફરી એકવાર ભારે વાહનો દ્વારા થતી બેદરકારી અને તેના ભયંકર પરિણામો પર પ્રકાશ પાડ્યો છે. ઘટનાની વિગતો મુજબ, એક લક્ઝરી બસ ઓવરલોડ સામાન ભરીને પસાર થઈ રહી હતી. બસની ઉપર વધુ પડતો સામાન હોવાને કારણે તે માર્ગ પર આવેલા એક ઝાડની ડાળી સાથે અથડાઈ. આ અથડામણ એટલી જોરદાર હતી કે ઝાડની મોટી ડાળી તૂટીને નીચે પડી હતી. આ સમયે, ત્યાંથી પસાર થઈ રહેલા એક એક્ટિવા ચાલક યુવક પર આ ડાળી સીધી પડી હતી.

ઝાડની ડાળી પડતા એક્ટિવા ચાલકનું મોત

ડાળી પડવાને કારણે યુવકને માથાના ભાગે અને શરીરમાં ગંભીર ઇજાઓ થઈ હતી. તાત્કાલિક તેને સારવાર માટે નજીકની હોસ્પિટલમાં ખસેડવામાં આવ્યો હતો, પરંતુ ગંભીર ઇજાઓને કારણે સારવાર દરમિયાન તેનું મૃત્યુ થયું હતું. આ ઘટનાથી યુવકના પરિવારમાં શોકનું મોજું ફરી વળ્યું છે. આ દુર્ઘટના બાદ માધુપુરા પોલીસે ઘટનાસ્થળે પહોંચી હતી અને તાત્કાલિક ફરિયાદ નોંધી કાર્યવાહી હાથ ધરી હતી. પોલીસે લક્ઝરી બસના ડ્રાઈવર વિરુદ્ધ સાપરાધ મનુષ્ય વધનો ગુનો નોંધીને વધુ તપાસ શરૂ કરી છે. પોલીસે બસ ડ્રાઇવરની ધરપકડ કરીને આ મામલે કાયદેસરની કાર્યવાહી હાથ ધરી છે.

માધુપુરા પોલીસે સાપરાધ મનુષ્યવધનો ગુનો નોંધ્યો

આ ઘટના પરથી સ્પષ્ટ થાય છે કે, ભારે વાહનોના ચાલકો દ્વારા ટ્રાફિકના નિયમોનું પાલન ન કરવું અને બેદરકારીભર્યું વાહન ચલાવવું કેટલું જોખમી સાબિત થઈ શકે છે. ઓવરલોડ વાહનો ટ્રાફિક અને સામાન્ય નાગરિકો માટે મોટું જોખમ ઊભું કરે છે. આ પ્રકારની દુર્ઘટનાઓ અટકાવવા માટે ટ્રાફિક પોલીસ અને સંબંધિત વિભાગો દ્વારા કડક પગલાં લેવા અને વાહનચાલકોમાં જાગૃતિ લાવવાની તાતી જરૂર છે.