Ahmedabad જિલ્લાની 40થી વધુ સરકારી પ્રાથમિક શાળામાં શાળા સલામતી સપ્તાહનું આયોજન

રાજ્યભરમાં 'શાળા સલામતી સપ્તાહ 2025'નો પ્રારંભ થયો છે. ગુજરાત રાજ્ય આપત્તિ વ્યવસ્થાપન સતામંડળ (GSDMA) અને શિક્ષણ વિભાગના સંયુક્ત ઉપક્રમે આ આયોજન કરવામાં આવ્યું છે. તા. 25 જાન્યુઆરી સુધી રાજ્યમાં 'શાળા સલામતી સપ્તાહ'ની ઉજવણી કરાશે.

શોર્ટ સર્કિટ જેવા વિષયો પર સેફ્ટી અંગે નિદર્શન

જે અંતર્ગત અમદાવાદ જિલ્લાની 40થી વધુ શાળાઓમાં ડિસ્ટ્રિક્ટ ડિઝાસ્ટર સેલ દ્વારા જિલ્લા શિક્ષણ તંત્રના સહયોગથી ઉજવણી કરવામાં આવી હતી. જેમાં વિદ્યાર્થીઓને કુદરતી આપત્તિ સમયે સાવચેતીના ભાગરૂપે શું તકેદારી રાખવી તેની સમજણ આપવામાં આવી હતી. શાળાઓમાં ભૂકંપ, આગ, અકસ્માત, પૂર અને શોર્ટ સર્કિટ જેવા વિષયો પર સેફ્ટી અંગે નિદર્શન અપાયું હતું.

પ્રેઝન્ટેશન દર્શાવવામાં આવ્યું

આ ઉપરાંત NDRF/SDRFનું રેસ્ક્યુ નિદર્શન અને પ્રેઝન્ટેશન દર્શાવવામાં આવ્યું હતું. વધુમાં શાળાના શિક્ષકો અને વાલીઓને પણ સંભવિત આપદા સામે જાગૃત કરી બચાવ કામગીરી અંગે સમજાવાયું હતું તથા આરોગ્ય વિષયક તાલીમ પણ આપવામાં આવી હતી.આ પ્રકારે અમદાવાદ જિલ્લાની અન્ય શાળાઓમાં પણ 'શાળા સલામતી સપ્તાહ' અંતર્ગત વિવિધ કાર્યક્રમો યોજાઈ રહ્યા છે. ચિત્ર, વકૃત્વ અને નિબંધ સ્પર્ધાઓનું પણ આયોજન કરાઈ રહ્યું છે.