Ahmedabad: અનુપમ બ્રિજથી હાટકેશ્વર ચાર રસ્તા પર 'બેફામ' પાર્કિંગ છતાં કાર્યવાહી નહીં

ખોખરા વિસ્તારમાં સતત ટ્રાફિક જામની ફરિયાદ સ્થાનિકો દ્વારા કરવામાં આવી રહી છે. જેમાં અનુપમ સિનેમાથી ખોખરા સર્કલ તરફ જતાં કે.કા.શાસ્ત્રી કોલેજ નજીક ઘણાં શોપિંગ કોમ્પલેક્ષ આવેલા છે.

જેના દ્વારા રસ્તા પર જ વાહનો પાર્ક કરવામાં આવી રહ્યા છે. આ કારણે ત્યાંથી અવરજવર કરતાં લોકોને પણ મુશ્કેલી ઉભી થઈ રહી છે. આ માટે મુખ્ય માર્ગ હોવા છતાં પણ ટ્રાફિક પોલીસ કે ટોઈંગની ગાડી દ્વારા કોઈ પણ પ્રકારની કાર્યવાહી કરવામાં આવી રહી નથી. જેના કારણે ત્યાંથી પસાર થતાં ટુ-વ્હીલર અને ફોર વ્હીલર ચાલકોને ભારે મુશ્કેલી થઈ રહી છે. તેમજ ત્યાંના સ્થાનિકોને પણ મુશ્કેલીનો સામનો કરવો પડી રહ્યો છે. એટલું જ નહીં આ રોડ આગળ જઈને હાટકેશ્વર બ્રિજ અને અનપુમ બ્રિજને મળે છે ત્યાંથી શહેરમાં ઘણી મોટા વ્હીકલની પણ અવરજવર થતી હોય છે. આ સ્થિતિમાં રોડ પર બેફામ પાર્કિંગ કરતાં લોકોને અટકાવવામાં આવે તેવી જ સ્થાનિકોની રજુઆત છે. રોડ પર પાર્ક કરવામાં આવતી ગાડીઓ પર જરૂરી કાર્યવાહી કરવામાં આવે તો લોકોને મોટી રાહત મળી શકે છે.