Ahmedabad News : હવામાન વિભાગની આગાહી, ઉત્તર ગુજરાત સહિત સૌરાષ્ટ્રમાં પડશે ભારે વરસાદ

હવામાન વિભાગ દ્વારા રાજ્યમાં શુક્રવાર અને આગામી બે દિવસ માટે ભારેથી અતિભારે વરસાદની આગાહી કરવામાં આવી છે. આજે રાજ્યના કેટલાક વિસ્તારોમાં ભારે વરસાદ પડી શકે છે. ખાસ કરીને, સાબરકાંઠા, અરવલ્લી, મહીસાગર, દાહોદ અને પંચમહાલ જિલ્લામાં ભારે વરસાદની આગાહી કરવામાં આવી છે. આ વિસ્તારોમાં રહેતા લોકોને સાવચેત રહેવા સૂચનાઓ આપવામાં આવી છે.

ઉત્તર ગુજરાત સહિત સૌરાષ્ટ્રમાં પણ પડશે વરસાદ

તમને જણાવી દઈએ કે, હવામાન વિભાગ દ્વારા આગાહીના ભાગરૂપે તંત્ર પણ હરકતમાં આવી ગયું છે. ઉત્તર ગુજરાત સહિત સૌરાષ્ટ્રમાં પણ અતિભારે વરસાદ પડશે તેવું જણાવવામાં આવ્યું છે. આ સિવાય અમદાવાદમાં હળવાથી માધ્યમ વરસાદની આગાહી કરવામાં આવી છે.

હવામાન વિભાગની આગાહી

અમદાવાદમાં આજે હળવાથી મધ્યમ વરસાદની આગાહી કરવામાં આવી છે. શહેરીજનોને છત્રી કે રેઈનકોટ સાથે રાખવા અને વાતાવરણમાં થતા ફેરફારો પર ધ્યાન આપવા વિનંતી છે. હવામાન વિભાગે નીચાણવાળા વિસ્તારોમાં પાણી ભરાવાની સંભાવના અને નદીઓમાં જળસ્તર વધવાની શક્યતા અંગે પણ ચેતવણી આપી છે. લોકોને તંત્ર દ્વારા અપાતી સૂચનાઓનું પાલન કરવા અને જરૂર ન હોય તો બહાર નીકળવાનું ટાળવા અપીલ કરવામાં આવી છે.