Ahmedabad News: કાંકરિયામાં નવી બનેલી બાલવાટિકામાં 27 એક્ટિવીટી શરૂ કરાઈ, 50 રૂપિયાની ટીકિટમાં આટલું ફ્રીમાં મળશે

અમદાવાદના કાંકરિયામાં બાળકો માટે બાલ વાટિકા આકર્ષણનું કેન્દ્ર ગણાય છે. આ બાલવાટીકાનું 22 કરોડના ખર્ચે મોર્ડનાઈઝેશન કરવામાં આવ્યું છે. આજે મુખ્યમંત્રી ભૂપેન્દ્ર પટેલ દ્વારા આ બાલ વાટિકાનું લોકાર્પણ કરવામાં આવ્યું છે. નવી બનાવવામાં આવેલી બાલ વાટિકામાં બાળકો અને યુવાનો માટે 27 એક્ટિવીટી શરૂ કરાઈ છે.

બાલવાટિકાને પીપીપી ધોરણે તૈયાર કરવામાં આવી

અમદાવાદના નગરજનો માટે AMC દ્વારા કાંકરિયામાં જૂની બાલવાટિકાનું 22 કરોડના ખર્ચે મોર્ડનાઈઝેશન કરાયું છે. બાળકો તેમજ યુવાનોને પસંદ આવે તેવી વિવિધ એક્ટિવિટીઝનું નવા રૂપ રંગમાં નિર્માણ કરવામાં આવ્યું છે.આ બાલવાટિકાનું મુખ્યમંત્રી ભૂપેન્દ્ર પટેલ દ્વારા લોકાર્પણ કરવામાં આવ્યું છે. અંદાજિત 22 કરોડના ખર્ચે બાલવાટિકાને પીપીપી ધોરણે તૈયાર કરવામાં આવી છે. બાળકો તેમજ યુવાનોને પસંદ આવે તેવી મોડર્ન જમાના અનુરૂપ અલગ અલગ 27 પ્રકારની એક્ટિવિટી શરૂ કરવામાં આવી છે.

શરૂઆતમાં 50 રૂપિયા એન્ટ્રી ફી રાખવામાં આવી

આ નવી બાલવાટિકામાં શરૂઆતમાં 50 રૂપિયા એન્ટ્રી ફી રાખવામાં આવી છે. જેમાં પાંચ એક્ટિવિટી ફ્રી રાખવામાં આવી છે. અન્ય એક્ટિવિટી માટે અલગ અલગ ચાર્જ લેવામાં આવશે. બાલવાટિકામાં ડાયનાસોર ટ્રેન, ડાયનાસોર પાર્ક, બટરફ્લાય પાર્ક, કિડ્સ ગો કાર્ટ, વેક્સ મ્યુઝિયમ સહિતના આકર્ષણો ઉભા કરવામાં આવ્યાં છે. નવા રંગરૂપ વાળી બાલ વાટિકામાં AMCએ તૈયાર કરવા 22 કરોડનો ખર્ચ કર્યો છે.