Ahmedabad News: 11.42 કરોડના ડિજિટલ અરેસ્ટ કૌભાંડમાં CBIએ બે આરોપીઓની ધરપકડ, 10 રાજ્યોમાં 22 સ્થળોએ રેડ

ગુજરાતમાં સાયબર ઠગાઈના વધતા જતા બનાવો વચ્ચે સેન્ટ્રલ બ્યુરો ઓફ ઇન્વેસ્ટિગેશન (CBI) દ્વારા એક ખૂબ જ મોટું પગલું ભરવામાં આવ્યું છે. રાજ્યમાં સાયબર ઠગ્સ દ્વારા આચરવામાં આવેલા રૂ. 11.42 કરોડના ચકચારી ડિજિટલ અરેસ્ટ કેસમાં તપાસનો ધમધમાટ શરૂ કરી દેવામાં આવ્યો છે. CBIએ આ કૌભાંડમાં સંડોવાયેલા મુખ્ય બે આરોપીઓની ધરપકડ કરી લીધી છે, જેમાં હિમાન્શુ પ્રસાદ અને યુનિસ બિસ્વાસના નામ સામે આવ્યા છે. આ બંને આરોપીઓ દ્વારા ગુનાખોરી આચરીને ગેરકાયદેસર રીતે રૂ. 2.5 કરોડની જંગી રકમ મેળવવામાં આવી હોવાનું તપાસમાં બહાર આવ્યું છે.

10 રાજ્યોમાં 22 સ્થળોએ સઘન તપાસ

આ મામલાની ગંભીરતાને ધ્યાનમાં રાખીને કેન્દ્રીય તપાસ એજન્સી CBI દ્વારા દેશના કુલ 10 રાજ્યોમાં 22 સ્થળોએ એકસાથે સઘન તપાસ કરવામાં આવી રહી છે. આ વ્યાપક સર્ચ ઓપરેશન દરમિયાન એજન્સી દ્વારા અનેક મહત્વપૂર્ણ બેન્ક દસ્તાવેજો તેમજ ડિજિટલ ડિવાઇસ જપ્ત કરવામાં આવ્યા છે. પ્રાથમિક તપાસમાં ખુલાસો થયો છે કે, આ કૌભાંડકારો દ્વારા હેક્સાક્વેસ્ટ ગ્લોબલ (Hexaquest Global) ના બેન્ક એકાઉન્ટનો ગેરકાયદેસર ઉપયોગ કરીને છેતરપિંડીના નાણાં અન્ય અલગ-અલગ ખાતાઓમાં સહીસલામત રીતે ટ્રાન્સફર કરવામાં આવતા હતા.

APK ફાઇલ દ્વારા આચરવામાં આવતું ખતરનાક સાયબર ફ્રોડ

સાયબર ઠગ્સની આ મોડસ ઓપરેન્ડી અત્યંત આધુનિક અને ખતરનાક હતી. આરોપીઓ સામાન્ય નાગરિકોને શિકાર બનાવવા માટે મોબાઈલમાં APK ફાઇલ મોકલીને સાયબર ફ્રોડ આચરતા હતા. ત્યારબાદ લોકોને ખોટી રીતે ડરાવીને "ડિજિટલ અરેસ્ટ" કરવામાં આવ્યા હોવાનું નાટક રચીને લાખો રૂપિયા પડાવવામાં આવતા હતા. આ રેકેટ સાથે જોડાયેલા અન્ય સાગરીતોની ભાળ મેળવવા માટે હાલ CBI દ્વારા વધુ કડક પૂછપરછ અને તપાસનો દોર શરૂ કરવામાં આવ્યો છે.

CBIની અપીલ, નાગરિકો સાવચેત રહે

આ સમગ્ર ઘટના બાદ CBI દ્વારા દેશભરના નાગરિકો માટે એક વિશેષ ચેતવણી અને અપીલ કરવામાં આવી છે. એજન્સીએ સ્પષ્ટ શબ્દોમાં જણાવ્યું છે કે, કોઈપણ સરકારી એજન્સી કે પોલીસ ક્યારેય પણ ઓનલાઇન વીડિયો કોલ કરીને "ડિજિટલ અરેસ્ટ" કરતી નથી. જો તમને પણ આવા કોઈ શંકાસ્પદ કોલ કે ધમકીઓ મળે, તો તરત જ ડર્યા વગર સાયબર ક્રાઇમ હેલ્પલાઇન અથવા સ્થાનિક પોલીસનો સંપર્ક કરવો.

આ પણ વાંચો: Ahmedabad News : વાઈબ્રન્ટ નવરાત્રિમાં 100થી 200 રૂપિયા કોઈ મોટો ચાર્જ નથી, કોંગ્રેસ પાસે અધૂરી માહિતી છેઃ DyCm હર્ષ સંઘવી