Ahmedabad ગ્રામ્ય પોલીસની મોટી કાર્યવાહી: 4.19 કરોડની કિંમતની 93 હજારથી વધુ દારૂની બોટલો પર બુલડોઝર ફેરવાયું

અમદાવાદ ગ્રામ્ય પોલીસ અને વહીવટી તંત્ર દ્વારા માદક પદાર્થો વિરુદ્ધની ઝુંબેશના ભાગરૂપે એક મોટી કાર્યવાહી હાથ ધરવામાં આવી છે. ધંધુકા, ધોલેરા અને બગોદરા પોલીસ સ્ટેશન હેઠળ અલગ-અલગ ગુનાઓમાં પકડાયેલા વિદેશી દારૂના જથ્થાનો આજે કાયદેસર રીતે નાશ કરવામાં આવ્યો હતો. આ પ્રક્રિયા દરમિયાન નશાબંધી અને આબકારી ખાતાના ઉચ્ચ અધિકારીઓ તેમજ સંબંધિત પોલીસ મથકોના થાણા અધિકારીઓ પણ ઉપસ્થિત રહ્યા હતા.

93,000થી વધુ બોટલો પર ફરી વળ્યું બુલડોઝર

ધંધુકા ખાતે આવેલી ડમ્પિંગ સાઈટ પર આ દારૂના જથ્થાનો નાશ કરવાની પ્રક્રિયા હાથ ધરવામાં આવી હતી. આ કાર્યવાહીમાં કુલ 93,426 વિદેશી દારૂની બોટલોને જમીન પર પાથરીને તેના પર બુલડોઝર અને રોલર ફેરવી દેવામાં આવ્યા હતા. આ સમગ્ર જથ્થાની બજાર કિંમત અંદાજે 4,19,70,573 રૂપિયા આંકવામાં આવી હતી. આટલી મોટી કિંમતના માદક પદાર્થોનો નાશ કરીને તંત્ર દ્વારા દારૂબંધીના કાયદાના કડક પાલનનો સંદેશ આપવામાં આવ્યો છે.

ઉચ્ચ અધિકારીઓની દેખરેખ હેઠળ પારદર્શક પ્રક્રિયા

આ સમગ્ર કાર્યવાહી આસિસ્ટન્ટ કલેક્ટર વિદ્યા સાગર અને અન્ય ઉચ્ચ અધિકારીઓની સીધી દેખરેખ હેઠળ કરવામાં આવી હતી. કાયદેસરની જોગવાઈઓ મુજબ, પોલીસ દ્વારા પકડાયેલા મુદ્દામાલનો અમુક સમય બાદ નિકાલ કરવામાં આવતો હોય છે. દારૂની તમામ બોટલો તોડી નાખ્યા બાદ તે પ્રવાહીને ખાડાઓમાં ડાટી દેવાની પ્રક્રિયા પણ પૂર્ણ કરવામાં આવી હતી. આ કાર્યવાહીને પગલે બૂટલેગરોમાં ફફડાટ વ્યાપી ગયો છે.

ગુજરાતના વધુ સમાચાર વાંચવા માટે ક્લિક કરો