Ahmedabad: કૃષ્ણનગરમાંથી વિદેશી દારૂનો મોટો જથ્થો ઝડપાયો; જૂનાં કપડાંની આડમાં પાર્સલથી મંગાવેલી 2,736 બોટલો જપ્ત

રાજ્યમાં નવરાત્રિ અને આગામી દિવાળીના તહેવારોને ધ્યાનમાં રાખીને ગેરકાયદે દારૂની હેરાફેરી સામે ચાલી રહેલી ઝુંબેશ અંતર્ગત અમદાવાદ પોલીસને મોટી સફળતા સાંપડી છે. શહેરના કૃષ્ણનગર વિસ્તારમાં આવેલા હાઉસિંગ બોર્ડના મકાનોમાં પોલીસે ઓચિંતો દરોડો પાડીને મોટા પાયે સંતાડવામાં આવેલો વિદેશી દારૂનો જથ્થો ઝડપી પાડ્યો છે. બુટલેગરો પોલીસની નજરથી બચવા માટે જૂનાં કપડાંના પાર્સલની આડમાં રાજસ્થાનથી આ દારૂ મંગાવતા હોવાની ચોંકાવનારી મોડસ ઓપરેન્ડી સામે આવી છે. પોલીસે સ્થળ પરથી 2,736 બોટલ વિદેશી દારૂ જપ્ત કરી ત્રણ આરોપીઓની ધરપકડ કરી છે.

હાઉસિંગ બોર્ડના મકાનમાં ચાલતું હતું દારૂનું છૂપું ગોડાઉન

કૃષ્ણનગર પોલીસને મળેલી ચોક્કસ બાતમીના આધારે હાઉસિંગ બોર્ડના રહેણાંક મકાનોમાં સર્ચ ઓપરેશન હાથ ધરવામાં આવ્યું હતું. મકાનમાં તલાશી લેતાં વિવિધ બ્રાન્ડની ભારતીય બનાવટના વિદેશી દારૂની પેટીઓ મળી આવી હતી, જેની ગણતરી કરતાં કુલ 2,736 બોટલો મળી આવી હતી. તપાસમાં ખૂલ્યું હતું કે બુટલેગરો પોલીસ અને ચેકપોસ્ટની આંખમાં ધૂળ નાખવા માટે ટ્રાન્સપોર્ટ મારફતે જૂનાં કપડાંની ગાંસડીઓ અને પાર્સલમાં દારૂની બોટલો પેક કરાવીને મંગાવતા હતા.

ત્રણ સ્થાનિક બુટલેગરો ઝડપાયા, રાજસ્થાન કનેક્શન ખૂલ્યું

પોલીસે સ્થળ પરથી દારૂના આ સમગ્ર નેટવર્કનું સંચાલન કરતા ત્રણ શખ્સોને દબોચી લીધા છે.ધરપકડ કરાયેલા આરોપીઓ: નિતેશ શાહ, જય ઉર્ફે દાદુ પાવર અને કિશન શાહ.રાજસ્થાનથી મોકલાયો હતો જથ્થો: પ્રાથમિક પૂછપરછમાં આરોપીઓએ કબૂલાત કરી હતી કે આ દારૂનો મોટો જથ્થો રાજસ્થાનથી કુખ્યાત સપ્લાયર ઓમપ્રકાશ બિશ્નોઈ દ્વારા મોકલવામાં આવ્યો હતો.સપ્લાયરને પકડવા તપાસનો ધમધમાટ તેજ

આ સમગ્ર મામલે કૃષ્ણનગર પોલીસે પ્રોહિબિશન એક્ટની વિવિધ કલમો હેઠળ ગુનો નોંધી આગળની કાનૂની કાર્યવાહી હાથ ધરી છે.આ જથ્થો અમદાવાદ શહેરના કયા-કયા સ્થાનિક પેડલરોને સપ્લાય કરવાનો હતો તે અંગે આરોપીઓની રિમાન્ડ મેળવી સઘન પૂછપરછ કરવામાં આવી રહી છે.રાજસ્થાન સ્થિત મુખ્ય સપ્લાયર ઓમપ્રકાશ બિશ્નોઈને ઝડપી પાડવા તેમજ ટ્રાન્સપોર્ટ એજન્સીની સંડોવણી તપાસવા માટે પોલીસે વિશેષ ટીમ બનાવી તપાસનો દોર લંબાવ્યો છે.

આ પણ વાંચો: Surat: રવિવારની રજા આપવા એસોસિએશન રાજી; પણ નિયમો પાળવા પડશે, એમ્બ્રોઇડરી વિવાદ ઉકેલવા કારખાનેદારોની એકતાનો હુંકાર