Ahmedabad એરપોર્ટ પર સોનાની દાણચોરીનો પર્દાફાશ: દુબઈથી આવેલી મહિલા પાસેથી રૂ.35.49 લાખનું સોનું જપ્ત

અમદાવાદના સરદાર વલ્લભભાઈ પટેલ આંતરરાષ્ટ્રીય એરપોર્ટ પર સોનાની દાણચોરીનો વધુ એક કિસ્સો પ્રકાશમાં આવ્યો છે. દુબઈથી અમદાવાદ પહોંચેલી એક મહિલા મુસાફર પર શંકા જતાં કસ્ટમ્સ વિભાગની એર ઈન્ટેલિજન્સ યુનિટ (AIU) દ્વારા તેની અટકાયત કરીને સઘન પૂછપરછ હાથ ધરવામાં આવી હતી. મહિલાની તલાશી દરમિયાન તેની પાસેથી ગેરકાયદેસર રીતે લાવવામાં આવેલું કિંમતી સોનું મળી આવ્યું હતું, જેથી એરપોર્ટ પર ફરી એકવાર સોનાની દાણચોરીનો પર્દાફાશ થયો છે.

24 કેરેટનું સોનું અને દાગીના જપ્ત

તપાસ દરમિયાન મહિલા મુસાફર પાસેથી 240.830 ગ્રામ વજન ધરાવતું 24 કેરેટનું શુદ્ધ સોનું જપ્ત કરવામાં આવ્યું હતું. આ સોનાના દાગીનામાં ચાર સોનાની બંગડીઓ અને પેન્ડન્ટ સાથેની સોનાની ચેઇનનો સમાવેશ થાય છે. જપ્ત કરાયેલા આ સોનાની બજાર કિંમત રૂ.35.49 લાખથી પણ વધુ આંકવામાં આવી છે. મહિલા કસ્ટમ્સ અધિકારીઓ સામે આ સોના અંગેના કોઈ પણ માન્ય કે કાયદેસરના દસ્તાવેજો રજૂ કરી શકી ન હતી.

કસ્ટમ્સ એક્ટ હેઠળ ગુનો નોંધી વધુ તપાસ શરૂ

સોના સંબંધિત યોગ્ય પુરાવા કે દસ્તાવેજો ન મળતાં અમદાવાદ કસ્ટમ્સ AIU ની ટીમ દ્વારા કસ્ટમ્સ એક્ટ હેઠળ કાર્યવાહી કરીને સમગ્ર સોનું જપ્ત કરી લેવામાં આવ્યું છે. મહિલા દ્વારા આ સોનું કોના માટે લાવવામાં આવ્યું હતું અને આ દાણચોરી પાછળ કોઈ મોટી આંતરરાષ્ટ્રીય સિન્ડિકેટ કાર્યરત છે કે કેમ, તે દિશામાં કસ્ટમ્સ વિભાગે ઊંડાણપૂર્વકની વધુ તપાસ હાથ ધરી છે.

ગુજરાતના વધુ સમાચાર વાંચવા માટે ક્લિક કરો