Ahmedabadમાં દારૂ પીધેલી હાલતમાં નબીરો કાર લઈને ફરવા નીકળ્યો અને સર્જ્યો અકસ્માત, બાદમાં પોલીસ પર રોફ જમાવવાનો પ્રયાસ

અમદાવાદમાં મોડી રાત્રે એક નબીરાએ દારૂ પીને બેફામ ગાડી ચલાવીને અકસ્માત સર્જ્યો હતો. આ ઘટના શહેરના સહજાનંદ કોલેજ ચાર રસ્તા પાસે બની હતી. અકસ્માત બાદ નબીરાએ પોતાને પોલીસકર્મી ગણાવીને રોફ જમાવવાનો પ્રયાસ કર્યો હતો. પરંતુ પોલીસે તેની અટકાયત કરી છે. રાત્રે એક લક્ઝરી કાર ચલાવી રહેલા નબીરાએ બેફામ રીતે ગાડી હંકારીને એક અન્ય વાહનને ટક્કર મારી હતી.

સહજાનંદ કોલેજ ચાર રસ્તા પાસે અકસ્માત

આ અકસ્માતને કારણે વાહનને મોટું નુકસાન થયું હતું. અકસ્માત બાદ કારચાલક નબીરાએ ઉશ્કેરાઈને સામેના વાહનચાલક સાથે ઝઘડો કર્યો હતો. તે સમયે નબીરાએ હું પોલીસમાં છું, મારું કંઈ નહીં બગાડી શકો તેમ કહીને ધમકાવવાનો પ્રયાસ કર્યો હતો. ઘટનાની જાણ થતાં જ પોલીસની ટીમ તાત્કાલિક ઘટનાસ્થળે પહોંચી હતી.

દારુ પીને ગાડી ચલાવી સર્જ્યો અકસ્માત

પોલીસે નબીરાને પકડીને તેની પૂછપરછ કરતા તે નશાની હાલતમાં હોવાનું જણાઈ આવ્યું હતું. ત્યારબાદ પોલીસે તેની ધરપકડ કરી હતી. અકસ્માત સર્જીને રોફ જમાવતા નબીરાને પોલીસે કાયદાનો પાઠ ભણાવ્યો હતો. પોલીસે આરોપી સામે કાયદેસરની કાર્યવાહી હાથ ધરી છે. આ ઘટનાએ ફરી એકવાર શહેરમાં રાત્રે થતા અકસ્માતો અને બેફામ વાહન ચલાવતા નબીરાઓની સમસ્યાને ઉજાગર કરી છે.