Ahmedabadમાં ખૂની ખેલનો પર્દાફાશ: મિત્રની હત્યા કરી મૃતદેહ સળગાવનાર 3 નરાધમોને સરખેજ પોલીસે જેલના સળિયા ગણતા કર્યા

અમદાવાદના સરખેજ વિસ્તારમાં આવેલા વણઝર ગામની સીમમાંથી થોડા દિવસો અગાઉ એક અજાણ્યા યુવકની અડધી સળગેલી હાલતમાં મૃતદેહ મળી આવતા સમગ્ર પંથકમાં ચકચાર મચી ગયો હતો. મૃતદેહની હાલત જોતા પ્રાથમિક દ્રષ્ટિએ જ આ હત્યા હોવાનું જણાતું હતું. પોલીસે આ મામલે તપાસ હાથ ધરી મૃતકની ઓળખ કરી હતી અને તેના આધારે કડીઓ મેળવતા આ એક આયોજિત હત્યાકાંડ હોવાનું બહાર આવ્યું હતું. પોલીસની તપાસમાં ખૂલ્યું હતું કે યુવકની હત્યા કર્યા બાદ પુરાવા નાશ કરવાના ઈરાદે તેના પર જ્વલનશીલ પદાર્થ છાંટીને મૃતદેહને સળગાવી દેવામાં આવ્યો હતો.

પોલીસને બાતમી આપવાની અદાવતમાં હત્યા

સરખેજ પોલીસે ટેકનિકલ સર્વેલન્સ અને હ્યુમન ઇન્ટેલિજન્સની મદદથી આ હત્યાનો ભેદ ઉકેલી કાઢ્યો છે. પોલીસ તપાસમાં ચોંકાવનારો ખુલાસો થયો છે કે મૃતક યુવક પોલીસનો બાતમીદાર (ઈન્ફોર્મર) હોવાની શંકા તેના જ મિત્રોને ગઈ હતી. આરોપીઓને આશંકા હતી કે મૃતક તેમની ગેરકાયદેસર પ્રવૃત્તિઓની માહિતી પોલીસને પહોંચાડી રહ્યો છે. આ જ બાતમી આપવાની અદાવત રાખીને આરોપીઓએ યુવકને વિશ્વાસમાં લઈ અવાવરું જગ્યાએ બોલાવ્યો હતો અને ત્યાં તેની નિર્મમ હત્યા કરી નાખી હતી.

સરખેજ પોલીસે 3 આરોપીઓની કરી ધરપકડ

આ કેસમાં સરખેજ પોલીસે ત્વરિત કાર્યવાહી કરીને મુખ્ય સૂત્રધાર સહિત 3 આરોપીઓની અટકાયત કરી છે. પકડાયેલા આરોપીઓની પૂછપરછમાં જાણવા મળ્યું છે કે તેઓએ અગાઉથી જ હત્યાનો પ્લાન ઘડી રાખ્યો હતો જેથી ભવિષ્યમાં તેમની કોઈ પોલ પોલીસ સામે ન ખુલે. પોલીસે હાલ ત્રણેય આરોપીઓ વિરુદ્ધ હત્યા અને પુરાવા નાશ કરવાના ગુના હેઠળ કાયદેસરની કાર્યવાહી હાથ ધરી છે. આ ઘટનાને પગલે સરખેજ વિસ્તારમાં ગુનેગારોમાં ફફડાટ વ્યાપી ગયો છે, જ્યારે પોલીસે આ સફળ કામગીરી કરી હત્યાનો ભેદ માત્ર ગણતરીના કલાકોમાં જ ઉકેલી નાખ્યો છે.

ગુજરાતના વધુ સમાચાર વાંચવા માટે ક્લિક કરો