Ahmedabadના સાણંદ પોલીસ સ્ટેશનના આંગણામાં યુવકને ઝાડ સાથે બાંધી માર મારતો ફોટો વાયરલ

અમદાવાદ ગ્રામ્ય પોલીસ તંત્રને કટોકટીમાં મૂકે તેવી એક અત્યંત ચોંકાવનારી અને કાયદો-વ્યવસ્થા સામે સવાલો ઉઠાવતી ઘટના સામે આવી છે. સાણંદ પોલીસ સ્ટેશનની બિલકુલ બહાર, તેના આંગણામાં જ એક યુવકને ઝાડ સાથે દોરડા વડે ક્રૂરતાપૂર્વક બાંધી રાખવામાં આવ્યો હોવાનો એક ફોટો સોશિયલ મીડિયા પર જોરદાર વાયરલ થઈ રહ્યો છે. આ ફોટો સામે આવ્યા બાદ પોલીસ કર્મચારીઓની માનવતાવિહીન કામગીરીને લઈને લોકોમાં ભારે આક્રોશ ફાટી નીકળ્યો છે.

વાયરલ ફોટામાં બે શખ્સો ઉભેલા દેખાયા

સોશિયલ મીડિયા પ્લેટફોર્મ્સ પર વાયરલ થઈ રહેલા આ ફોટામાં સ્પષ્ટપણે જોઈ શકાય છે કે, ભોગ બનનાર યુવકને સાણંદ પોલીસ સ્ટેશનના પટાંગણમાં આવેલા એક ઝાડ સાથે બાંધી દેવાયો છે. એટલું જ નહીં, બે શખ્સો તેને દોરડા વડે પકડીને ઊભા રાખેલા દ્રશ્યમાન થાય છે અને આસપાસ અન્ય કેટલાક લોકો પણ મૂકપ્રેક્ષક બનીને ઊભા જોવા મળી રહ્યા છે. પોલીસ મથકની અંદર જ આ પ્રકારનું અત્યાચારભર્યું કૃત્ય આચરવામાં આવ્યું હોવાના ગંભીર આક્ષેપો થઈ રહ્યા છે.

સોશિયલ મીડિયામાં ઘટનાનો ફોટો થયો વાયરલ

આ અમાનવીય ઘટનાનો ફોટો વાયરલ થતાં જ સ્થાનિક નાગરિકો અને સોશિયલ મીડિયા યુઝર્સ દ્વારા પોલીસની આવી દાદાગીરી અને કાયદાના લીરેલીરા ઉડાડતી પદ્ધતિ સામે તીવ્ર સવાલો ઉઠાવવામાં આવી રહ્યા છે. રક્ષક જ ભક્ષક બન્યા હોય તેમ પોલીસ સ્ટેશનના પરિસરમાં કાયદો હાથમાં લેવાની સત્તા કોણે આપી, તેને લઈને ચર્ચાઓ જાગી છે. આ ચકચારી મામલે હવે અમદાવાદ ગ્રામ્ય પોલીસના ઉચ્ચ અધિકારીઓ દ્વારા તપાસના આદેશ આપવામાં આવે અને કસૂરવારો સામે કડક પગલાં લેવાય તેવી લોકમાંગ ઉઠી છે.

ગુજરાતના વધુ સમાચાર વાંચવા માટે ક્લિક કરો