Banaskanthaના થરાદમાં દારૂના નશામાં ધૂત કાર ચાલક ઝડપાયો, લાયસન્સ વગર ગાડી દોડાવતા કાર થઈ જપ્ત

બનાસકાંઠા જિલ્લાના સરહદી વિસ્તાર વાવ અને થરાદ પંથકમાં પોલીસે પ્રોહિબિશન ડ્રાઈવ અંતર્ગત કડક ચેકિંગ હાથ ધર્યું છે. આ દરમિયાન થરાદ પોલીસ સ્ટેશનના સ્ટાફને પેટ્રોલિંગ દરમિયાન એક મહિન્દ્રા કંપનીની કાર શંકાસ્પદ હાલતમાં પસાર થતી હોવાનું જણાયું હતું. પોલીસે ત્વરિત કાર્યવાહી કરીને આ કારને રસ્તામાં આંતરીને ઊભી રખાવી હતી અને તપાસ શરૂ કરી હતી.

દારૂના નશામાં ચુર શખ્સ પાસે ન મળ્યું લાયસન્સ 

પોલીસે જ્યારે કારના ચાલકની પૂછપરછ કરી ત્યારે સમગ્ર મામલો સામે આવ્યો હતો. કાર ચલાવી રહેલો ચમનભાઈ કનાભાઈ પરમાર નામનો શખ્સ દારૂના નશામાં એકદમ ધૂત હાલતમાં મળી આવ્યો હતો. પોલીસે તેની પાસે ગાડીના કાગળો અને ડ્રાઈવિંગ લાયસન્સની માંગણી કરી હતી, પરંતુ આરોપી ચમન પરમાર પાસે કારના કોઈ પાસ-પરમિટ કે કાયદેસરનું ડ્રાઈવિંગ લાયસન્સ મળી આવ્યું નહોતું. નશાની હાલતમાં સ્પીડમાં કાર ચલાવીને તે અન્ય લોકોના જીવને પણ જોખમમાં મૂકી રહ્યો હતો.

મોટર વ્હીકલ એક્ટ હેઠળ ગુનો દાખલ

થરાદ પોલીસે કાયદો હાથમાં લેનારા આ નશાખોર ચાલક વિરુદ્ધ પ્રોહિબિશન એક્ટ તેમજ મોટર વ્હીકલ (M.V.) એક્ટની વિવિધ કડક કલમો હેઠળ ગુનો નોંધી તેની ધરપકડ કરી છે. આ સાથે જ ગુનામાં વપરાયેલી અંદાજે 5,00,000 રૂપિયાની કિંમતની મહિન્દ્રા કારને પણ પોલીસે કાયદેસર રીતે જપ્ત કરી લીધી છે. આ ચકચારી કેસની આગળની સઘન તપાસ થરાદ પોલીસ સ્ટેશનના એ.એસ.આઈ. (ASI) હરેશસિંહ રાજપૂતને સોંપવામાં આવી છે.

ગુજરાતના વધુ સમાચાર વાંચવા માટે ક્લિક કરો