Weather News : રાજયમાં વરસાદની ગતિ ધીમી પડી, આજે હળવાથી મધ્યમ વરસાદની આગાહી કરાઈ

રાજ્યમાં વરસાદની ગતિ ધીમી પડી હોવાની વાત સામે આવી છે, રાજ્યમાં માત્ર હળવા વરસાદની આગાહી હવામાન વિભાગ દ્વારા કરવામાં આવી છે, માછીમારોને 2 ઓગષ્ટ સુધી દરિયો ન ખેડવા સૂચના આપવામાં આવી છે.

જાણો કયાં પડી શકે છે વરસાદ

હવામાન વિભાગની આગાહી પ્રમાણે રાજયમાં બનાસકાંઠા, પાટણ, મહેસાણા, સાબરકાંઠા, અમદાવાદ, અરવલ્લી, ગાંધીનગર, ખેડા, આણંદ, પંચમહાલ, દાહોદ, મહીસાગર, છોટા ઉદેપુર, નર્મદા, ભરૂચ, સુરત, ડાંગ, તાપી, નવસારી, વલસાડ, સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દ્વારકા, ગીર સોમનાથ, બોટાદ, કચ્છમાં વરસાદની આગાહી કરવામાં આવી છે.

કૂલ સિઝનનો સામાન્ય કરતાં 30 ટકા વધુ વરસાદ થયો

ગુજરાતમા જુલાઈના અંત સુધીમાં કૂલ સિઝનનો સામાન્ય કરતાં 30 ટકા વધુ વરસાદ થયો છે. અત્યાર સુધીમાં રાજ્યમાં 18 ઈંચ કરતાં વધુ વરસાદ નોંધાયો છે. રાજ્યમાં છેલ્લા 24 કલાકમાં 95 તાલુકામાં વરસાદ નોંધાયો છે, સૌથી વધુ કપરાડા તાલુકામાં 2.13 ઇંચ વરસાદ, વઘઇ અને ડાંગમાં 1.7 ઇંચ વરસાદ, ખેરગામ અને વાંસદામાં 1.6 ઇંચ વરસાદ, ધરમપુરમાં 1.4 ઇંચ, વલસાડમાં 1.1 ઇંચ વરસાદ અને વાપીમાં પોણો ઇંચ વરસાદ નોંધાયો છે.

ગુજરાતના 207 ડેમમાં 62.87 ટકા પાણીનો જથ્થો

ભારે વરસાદને કારણે ગુજરાતના 207 ડેમમાં 62.87 ટકા પાણીનો જથ્થો છે. જેમાં ઉત્તર ગુજરાતના 15 ડેમમાં 60.31, મધ્ય ગુજરાતના 17 ડેમમાં 69.21, દક્ષિણ ગુજરાતના 13 ડેમમાં 61.51, કચ્છના 20 ડેમમાં 55.69 અને સૌરાષ્ટ્રના 141 ડેમમાં 65.95 ટકા પાણીનો જથ્થો છે. જ્યારે સરદાર સરોવર યોજનામાં 62.46 ટકા પાણીનો જથ્થો છે. રાજ્યમાં હાલમાં 49 ડેમ હાઈ એલર્ટ, 24 ડેમ એલર્ટ અને 19 ડેમને વોર્નિંગ પર રાખવામાં આવ્યા છે.