Vadodaraના શિનોર તાલુકામાં મેઘરાજા મન મૂકીને વરસ્યા, સિઝનનો 21 ઇંચ વરસાદ નોંધાતા ખેડૂતોમાં ખુશીનો માહોલ

વડોદરા જિલ્લાના શિનોર તાલુકામાં આજે સાંજ પડતાં જ વરસાદી માહોલ જામ્યો હતો. જેના કારણે ગરમી અને અસહ્ય ઉકળાટથી પરેશાન લોકોને મોટી રાહત મળી હતી. સાધલી, અવાખલ, સેગવા સહિતના ગામોમાં સારો એવો વરસાદ નોંધાયો હતો. જેનાથી ખેડૂતોમાં ખુશીની લહેર વ્યાપી ગઈ હતી. સવારથી જ ભારે ઉકળાટ અને બફારા બાદ સાંજે વાતાવરણમાં અચાનક પલટો આવ્યો હતો.

સવારથી અસહ્ય ઉકળાટ બાદ સાંજ પડતાંજ વરસાદી માહોલ જામ્યો

આકાશ કાળા વાદળોથી ઘેરાઈ ગયું હતું અને જોતજોતામાં ધોધમાર વરસાદ શરૂ થયો હતો. આ વરસાદથી સમગ્ર શિનોર પંથકમાં ઠંડક પ્રસરી ગઈ હતી. ખેતીની દ્રષ્ટિએ આ વરસાદ અત્યંત મહત્વપૂર્ણ માનવામાં આવે છે. તાલુકામાં અત્યાર સુધી સિઝનનો કુલ 21 ઇંચ વરસાદ નોંધાયો છે. જે કપાસ, એરંડા અને અન્ય ચોમાસુ પાકો માટે અનુકૂળ છે.

તાલુકામાં કપાસ, એરંડા સહિત ચોમાસુ પાકોને અનુરૂપ વરસાદ વરસ્યો

આ વરસાદથી ખેતીના પાકોને જીવનદાન મળ્યું હતું અને ખેડૂતોના ચહેરા પર ખુશી જોવા મળી હતી. વરસાદના કારણે શિનોર તાલુકાના ખેડૂતોએ હવે રાહતનો શ્વાસ લીધો છે. તેઓ આશા રાખી રહ્યા છે કે આ વરસાદની સિઝન ચાલુ રહેશે, જેથી તેમને સારો પાક મળે અને આર્થિક રીતે તેઓ સમૃદ્ધ બની શકે. આ વરસાદે સમગ્ર તાલુકામાં એક હકારાત્મક ઉર્જાનો સંચાર કર્યો હતો.