Vadodara: વિવિધ વિસ્તારમાં MGVCLની ટીમના દરોડા, લાખો રૂપિયાની વીજ ચોરી ઝડપાઈ

19 ફેબ્રુઆરી 2025ના રોજ મધ્ય ગુજરાત વીજ કંપની લિમિટેડ (MGVCL)ની ચેકિંગ સ્ક્વોડ દ્વારા વડોદરા શહેરના સિટી સર્કલ હેઠળ આવતા વિશ્વામિત્ર ઈસ્ટ અને લાલબાગ વિભાગીય કચેરીના અનેક વિસ્તારોમાં વ્યાપક દરોડા પાડીને વીજ ચોરી કરતા લોકો સામે કડક કાર્યવાહી કરવામાં આવી છે.

35 લાખથી વધુનું પુરવણી બિલ બનશે

આ દરોડામાં માંડવી, પાણીગેટ અને વાડી સબ ડિવિઝનના ભદ્ર કચેરી, મહાવત ફળિયા, મીઠા ફળિયા સરસીયા તળાવ, યાકુતપુરા, શેખ ફરીદ મોહલ્લા, મટન માર્કેટ, કહાર‌ મોહલ્લા, બાવામાનપુરા, રામનાથ ચોક, હાથી ખાના જેવા વિસ્તારોમાં કુલ 1090 વીજ જોડાણની તપાસ હાથ ધરવામાં આવી હતી. આ કામગીરી દરમિયાન કુલ 43 વીજ જોડાણમાં વીજ ચોરીના અને 13 કિસ્સામાં ગેરરીતિના કેસ ઝડપાયા હતા. આ તમામ કેસમાંથી અંદાજિત 35.35 લાખ રૂપિયાનું પુરવણી બિલ બનશે તેવું જાણવા મળ્યું છે.

30 જાન્યુઆરીના રોજ વડોદરામાં લાખો રૂપિયાની વીજ ચોરી ઝડપાઈ હતી

તમને જણાવી દઈએ કે આ પહેલા 30 જાન્યુઆરીના રોજ પણ મધ્ય ગુજરાત વીજ કંપની લિમિટેડ (MGVCL)ની ચેકિંગ સ્ક્વોડ દ્વારા વડોદરા શહેરના બરોડા સિટી સર્કલ હેઠળ આવતા વિસ્તારોમાં વ્યાપક દરોડા પાડીને લાખો રૂપિયાની વીજ ચોરી સામે આવી હતી અને વીજ ચોરી કરનારા લોકો સામે કડક કાર્યવાહી કરવામાં આવી હતી.

કુલ 51 વીજ ચોરીના કેસ ઝડપાયા હતા

ઉલ્લેખનીય છે કે MGVCLની ચેકિંગ સ્કવોડ ટીમ દ્વારા માંડવી, પાણીગેટ અને વાડી સબ ડિવિઝનના વિસ્તારો દૂધવાલા મહોલ્લો, ચુડીવાલીગલી, છીપવાડ ભટ્રકચેરી, સરસ્યાતળાવ, યાકુતપુરા, શેખ ફરીદ મોહલ્લા, અજબડી મીલ, હજરત એપારમેન્ટ, જુનિગઢી, મૉગલવાડા, મટન માર્કેટ, કહાર‌ મોહલ્લા, નિસારબાપૂ પાર્ક, મેમણ કોલોની, સ્લમકવૉટસ જહાંગીરપુરા, ગોયગેટ, વી.એસ.યુ.પી. આવાસ સોમા તળાવ પાસે, મહાવત ફળિયું, પંજરીગર મહોલ્લો, ગેંડા ફળિયું, રાવત શેરી, અલીફ નગર, હાથી ખાના, નવાપૂરા, મહબૂબપુરા, ખારવા વાડ, કહાર મહોલ્લો અને કેવડા બાગ જેવા વિસ્તારોમાં કુલ 1,222 વીજ કનેક્શનો ચેક કરવામાં આવ્યા હતા. આ કામગીરી દરમિયાન કુલ 51 વીજ ચોરીના કેસ ઝડપાયા હતા. આ તમામ કેસમાંથી અંદાજિત 60 લાખ રૂપિયાનું પુરવણી બીલ બનશે તેવું જાણવા મળ્યું હતું.