Vadodara: અકોટા-દાંડિયા બજાર બ્રિજ પર રામાયણની દિવ્ય ઝાંખી; LED ચિત્રો દ્વારા શ્રીરામના જીવન આદર્શોનું પ્રદર્શન

પ્રકાશના મહાપર્વ દિવાળી અને નૂતન વર્ષના તહેવારોને વધાવવા માટે સંસ્કારી નગરી વડોદરા રંગબેરંગી ઝળહળતી રોશનીથી નહાઈ ઊઠી છે. વડોદરા મહાનગરપાલિકા (VMC) દ્વારા આ વર્ષે શહેરના મુખ્ય માર્ગો, બ્રિજ, ઐતિહાસિક ઇમારતો અને ચાર રસ્તાઓ પર કરવામાં આવેલી અદ્યતન સજાવટ વચ્ચે શહેરના હૃદયસમા અકોટા-દાંડિયા બજાર બ્રિજ પરની લાઈટિંગ વિશેષ આકર્ષણનું કેન્દ્ર બની છે. અકોટા બ્રિજ પર આધુનિક LED ટેકનોલોજીના માધ્યમથી રામાયણ આધારિત ભવ્ય પ્રસ્તુતિ અને ચિત્રો રજૂ કરવામાં આવ્યા છે. મર્યાદા પુરુષોત્તમ ભગવાન શ્રીરામના આદર્શ જીવનચરિત્ર અને રામાયણના પ્રેરણાદાયી પ્રસંગોનું જીવંત દર્શન કરાવતી આ ઝાંખીને નિહાળવા માટે સમગ્ર શહેરમાંથી લોકો મોટી સંખ્યામાં ઉમટી રહ્યા છે.

યુવા પેઢીને રામાયણના મૂલ્યોથી માહિતગાર કરવાનો પ્રયાસ

અકોટા-દાંડિયા બજાર બ્રિજ પર ગોઠવાયેલી વિશાળ LED સ્ક્રીન અને લાઈટિંગ મારફતે પ્રભુ શ્રીરામના જીવન, કર્તવ્યનિષ્ઠા, ત્યાગ અને રામાયણના ગૌરવશાળી પ્રસંગોને ડિજિટલ ચિત્રો સ્વરૂપે પ્રદર્શિત કરવામાં આવ્યા છે. આજની યુવા પેઢી અને બાળકો ભારતીય સંસ્કૃતિ, પૌરાણિક વારસા અને રામાયણના ઉચ્ચ મૂલ્યોથી વાકેફ થાય તેવા શુભ હેતુથી મનપા દ્વારા આ વિશિષ્ટ થીમ આધારિત સજાવટનું આયોજન કરવામાં આવ્યું છે.રાત્રિના સમયે અકોટા બ્રિજ પરથી પસાર થતાં વાહનચાલકો અને રાહદારીઓ થોડી ક્ષણો રોકાઈને આ મનમોહક રોશનીનો આનંદ માણી રહ્યા છે. આ ઝાંખી હાલ સ્થાનિકો તેમજ મુલાકાતીઓ માટે ફોટોગ્રાફી અને ફેમિલી આઉટિંગનું મુખ્ય કેન્દ્ર બની ગઈ છે.

મુખ્ય માર્ગો અને સર્કલો પર રંગબેરંગી રોશનીની જમાવટ

દિવાળી પર્વ નિમિત્તે વડોદરા મનપા દ્વારા સમગ્ર શહેરને રોશનીના શણગારથી ઝગમગાવી દેવામાં આવ્યું છે.શહેરના તમામ મુખ્ય રાજમાર્ગો, ફ્લાયઓવર, પ્રવેશદ્વારો તેમજ મહત્વપૂર્ણ ચાર રસ્તાઓ પર રંગબેરંગી રોશનીની પટ્ટીઓ, ડેકોરેટિવ પોલ્સ અને ઝુમ્મરો લગાવવામાં આવ્યા છે.રોશનીના આ અદ્ભુત શણગારના લીધે સંસ્કારી નગરી રાત્રિના સમયે નવવધૂની જેમ શોભી રહી છે અને શહેરભરમાં ઉત્સવનો માહોલ ચરમસીમાએ પહોંચ્યો છે.

આ પણ વાંચો: Rajkot: RMCએ ભાઈબીજના દિવસે મહિલાઓ માટે સિટી બસ અને BRTS માં મફત મુસાફરીની સત્તાવાર જાહેરાત