Surendranagar: ઝાલાવાડમાં દારૂના પાંચ સ્થળે દરોડા 7.58 લાખની મતા સાથે 4 પકડાયા

સુરેન્દ્રનગર જિલ્લામાં દારૂની બદીને ડામવા પોલીસે વઢવાણના લીંબડી રોડ, વડોદ કેનાલ પાસે, સુરેન્દ્રનગરના મુળચંદ રોડ, ચોટીલાના ખુશીનગર પાસે અને સાયલાના ધજાળા ગામે દારૂની રેડ કરી હતી. જેમાં 4 શખ્સો દારૂ, બીયર, મોબાઈલ, કાર સહિત રૂપીયા 7,58,052ની મત્તા સાથે પકડાયા હતા.

લીંબડીના બોડીયા ગામ તરફથી વઢવાણના વડોદ તરફ વિદેશી દારૂ ભરેલી કાર આવતી હોવાની બાતમી મળતા વડોદ કેનાલ પાસે વોચ રખાઈ હતી. જેમાં શંકાસ્પદ કાર આવતા તેને રોકી તપાસ કરતા કારમાંથી વિદેશી દારૂ મળી આવ્યો હતો. આથી પોલીસે બોડીયાના દિવ્યરાજસીંહ દિલુભા રેવરને વિદેશી દારૂની 24 બોટલ કિંમત રૂપીયા 28,800, રૂપીયા 20 હજારનો મોબાઈલ ફોન અને રૂપીયા 7 લાખની ક્રેટા કાર સહિત કુલ રૂપીયા 7,48,800ની મત્તા સાથે ઝડપી લઈ જોરાવરનગર પોલીસ મથકે ગુનો નોંધ્યો છે. જયારે સુરેન્દ્રનગર બી ડીવીઝન સહિતનાઓને પેટ્રોલીંગ દરમીયાન વઢવાણના વાઘેલા રોડ પર આવેલ શ્રીજીનગરમાં રહેતો મીતરાજસીંહ પ્રતાપસીંહ સેલારા મુળચંદ રોડ પર ભવાની ઓટો ગેરેજમાં વિદેશી દારૂ વેચતો હોવાની બાતમી મળતા રેડ કરાઈ હતી. જેમાં મીતરાજસીંહ વિદેશી દારૂની 7 બોટલો કિંમત રૂપીયા 4852ની મત્તા સાથે પકડાયો હતો. આ શખ્સની પ્રાથમીક પુછપરછમાં આ દારૂ વઢવાણના ગળીયા હનુમાન પાસે રહેતા વનરાજસીંહ ભુપતસીંહ સોલંકી સાથે ભાગમાં તે દારૂ લાવ્યો હોવાનું ખુલતા બન્ને સામે બી ડીવીઝન પોલીસ મથકે ફરિયાદ નોંધાઈ છે. આ ફરિયાદ નોંધાતા જ વઢવાણ પોલીસે વનરાજસીંહ ભુપતસીંહ સોલંકીના લીંબડી રોડ પર આવેલ વચ્છરાજ ગેરેજમાં દરોડો કર્યો હતો. પરંતુ પોલીસે દારૂની ર બોટલ અને બીયરના 4 ટીન સહિત કુલ રૂપીયા 3420ની મત્તા કબજે કરી હતી. સુરેન્દ્રનગર બી ડીવીઝન અને વઢવાણ પોલીસ મથકે નોંધાયેલા બન્ને દારૂના કેસમાં પોલીસ હાલ વનરાજસીંહ સોલંકીની તપાસ કરી રહી છે. બીજી તરફ ચોટીલા હાઈવે પર ખુશીનગરના ગેટ પાસેથી નવાગામનો સંતુ કાંતીભાઈ દેત્રોજા દારૂના 1 ચપલા કિંમત રૂપીયા 100 સાથે ઝડપાયો હતો. અને સાયલા તાલુકાના ધજાળા ગામના બસ સ્ટેશન પાસેથી સુદામડાનો સાહીલ પ્રવીણભાઈ રાઠોડ બીયરના 4 ટીન કિંમત રૂપીયા 880 સાથે પકડાયો હતો.