Suratના ચોક બજારમાં ગુનાહિત પૃષ્ઠભૂમિ ધરાવતા યુવકની સરેઆમ ધાતકી હત્યા

સુરત શહેરના ચોક બજાર વિસ્તારમાં આજે હત્યાનો એક સનસનાટીભર્યો બનાવ સામે આવ્યો છે. ચોક બજાર વિસ્તારમાં અજાણ્યા ઇસમો દ્વારા કલ્પેશ પારઘી નામના યુવક પર તીક્ષ્ણ હથિયાર વડે તાબડતોબ હુમલો કરવામાં આવ્યો હતો. ગંભીર રીતે ઘવાયેલા કલ્પેશ પારઘીનું ઘટનાસ્થળે જ કરૂણ મોત નિપજ્યું હતું. આ લોહિયાળ ખેલ ખેલ્યા બાદ ગુનો આચરનાર હત્યારાઓ સ્થળ પરથી ફરાર થઈ ગયા હતા. દિવસદહાડે બનેલી આ ઘટનાને પગલે સમગ્ર વિસ્તારમાં ભારે અફડાતફડી અને ભયનો માહોલ સર્જાયો હતો.

મૃતક પણ ગુનાહિત ઇતિહાસ ધરાવે છે 

પોલીસની પ્રાથમિક તપાસમાં સામે આવ્યું છે કે મૃતક કલ્પેશ પારઘી પોતે પણ ગુનાહિત ઇતિહાસ ધરાવતો હતો. તેની સામે અગાઉ પણ પોલીસ મથકમાં ગુના નોંધાયેલા હોવાની વિગતો પ્રકાશમાં આવી છે. આથી, આ હત્યા કોઈ જૂની અદાવત, ગેંગવોર કે અંગત મનદુઃખના કારણે કરવામાં આવી હોવાની આશંકા સેવાઈ રહી છે. ગુનાહિત પૃષ્ઠભૂમિ ધરાવતા યુવકની આ પ્રકારે દિનદહાડે હત્યા થતાં સ્થાનિક ગુનાખોરીના સમીકરણો અંગે પણ અનેક તર્ક-વિતર્ક વહેતા થયા છે.

પોલીસની દોડધામ અને તપાસનો ધમધમાટ 

હત્યાના બનાવની જાણ થતાં જ ચોક બજાર પોલીસ મથકનો કાફલો તુરંત ઘટનાસ્થળે પહોંચી ગયો હતો. પોલીસે મૃતદેહને કબ્જે કરી પોસ્ટમોર્ટમ અર્થે હોસ્પિટલ ખસેડવાની તજવીજ હાથ ધરી હતી. ચોક બજાર પોલીસે આ મામલે ગુનો નોંધીને ફરાર થયેલા હત્યારાઓને ઝડપી પાડવા માટે ચક્રો ગતિમાન કર્યા છે. બનાવ સ્થળની આસપાસના સીસીટીવી (CCTV) ફૂટેજ તપાસવાની સાથે બાતમીદારોને સક્રિય કરી પોલીસે હત્યારાઓનું સગડ મેળવવા વધુ તપાસ તેજ કરી છે.

ગુજરાતના વધુ સમાચાર વાંચવા માટે ક્લિક કરો