Surat News: પર્વત પાટીયાની હોટેલમાં ધમધમતું કુટણખાનું ઝડપાયું, પોલીસે સંચાલક અને ગ્રાહકની કરી ધરપકડ

સુરત શહેરમાં ગેરકાયદેસર અને અનૈતિક પ્રવૃત્તિઓ સામે સુરત ક્રાઈમ બ્રાંચની એન્ટી હ્યુમન ટ્રાફિકિંગ યુનિટ (AHTU) ની ટીમે એક મોટી સફળ કાર્યવાહી કરી છે. પર્વત પાટીયા વિસ્તારમાં આવેલી એક હોટેલમાં બહારથી યુવતીઓ લાવીને કુટણખાનું (સેક્સ રેકેટ) ચલાવવામાં આવી રહ્યું હોવાની ચોક્કસ બાતમી પોલીસને મળી હતી. આ બાતમીના આધારે AHTU ની ટીમે હોટેલ પર ઓચિંતો દરોડો પાડીને દેહવ્યાપારના કાળા કારોબારનો પર્દાફાશ કર્યો છે. પોલીસે ઘટનાસ્થળેથી હોટેલના સંચાલક અને એક ગ્રાહક સહિત કુલ બે શખ્સોની ધરપકડ કરી લીધી છે.

AHTU ટીમે હોટેલ પર પાડી ઓચિંતી રેડ

આ દરોડા દરમિયાન પોલીસે હોટેલના રૂમમાંથી ઉત્તર પ્રદેશ (UP) અને પશ્ચિમ બંગાળની બે પરપ્રાંતીય યુવતીઓને શોધી કાઢી હતી. આ યુવતીઓનું કાયદાકીય જોગવાઈઓ હેઠળ યોગ્ય કાઉન્સેલિંગ કરીને તેમને સહી-સલામત રીતે નરક સમાન દલદલમાંથી મુક્ત કરાવવામાં આવી છે. પોલીસ તપાસમાં ચોંકાવનારો ખુલાસો થયો છે કે, આ રેકેટ ચલાવતા દલાલો ગ્રાહકો પાસેથી કલાક દીઠ રૂપિયા 2,000 વસૂલતા હતા. જેમાંથી મજબૂર મહિલાઓને માત્ર રૂપિયા 1,000 આપવામાં આવતા હતા, જ્યારે બાકીના 50% પૈસા (રૂપિયા 1,000) દલાલો કમિશન પેટે પોતાની પાસે રાખી લેતા હતા.

હોટેલ માલિક અને 3 દલાલો ફરાર

પોલીસની પ્રાથમિક તપાસમાં સામે આવ્યું છે કે આ ગેરકાયદે નેટવર્ક પાછળ હોટેલનો મુખ્ય માલિક અજયગીરી મેઘનાથી સામેલ છે. પોલીસ રેડ દરમિયાન હોટેલ માલિક અજયગીરી અને ગ્રાહકોને લલચાવીને લાવતા અન્ય 3 મુખ્ય દલાલો પોલીસને થાપ આપીને ભાગી છૂટવામાં સફળ રહ્યા હતા. પોલીસે આ ચારેય વોન્ટેડ શખ્સો વિરુદ્ધ ઇમ્મોરલ ટ્રાફિકિંગ (પ્રિવેન્શન) એક્ટ હેઠળ ગુનો નોંધી તેમની શોધખોળ માટે અલગ-અલગ ટીમો બનાવીને ચક્રો ગતિમાન કર્યા છે.

ગુજરાતના વધુ સમાચાર વાંચવા માટે ક્લિક કરો