Surat નવી સિવિલ હોસ્પિટલમાં માથાભારે શખ્સનો આતંક: મહિલા કર્મચારીઓની છેડતી કરી રાત્રે રૂમમાં ઘૂસવાનો પ્રયાસ!

સુરતની નવી સિવિલ હોસ્પિટલમાં મહિલા કર્મચારીઓની સુરક્ષા સામે ગંભીર પ્રશ્નાર્થ ઊભો કરતી ઘટના સામે આવી છે. હોસ્પિટલ પરિસરમાં એક માથાભારે શખ્સે બિન્દાસપણે ઘૂસી જઈને આતંક મચાવ્યો હતો. આ અસામાજિક તત્વે હોસ્પિટલમાં ફરજ બજાવતી મહિલા કર્મચારીઓની છેડતી કરી હતી અને રાત્રિના સમયે તેમના રૂમમાં બળજબરીથી ઘૂસવાનો ગંભીર પ્રયાસ પણ કર્યો હતો. દર્દીઓની સારવાર કરતા તબીબી સ્ટાફ પર આ રીતે અસામાજિક તત્વ દ્વારા કરવામાં આવેલા માનસિક ત્રાસને કારણે હોસ્પિટલના કર્મચારીઓમાં ભારે ભય અને રોષનો માહોલ વ્યાપી ગયો છે.

પ્લાસ્ટિક સર્જરી વોર્ડમાં બિન્દાસ ઘૂસી મચાવ્યો અરાજકતા 

આ માથાભારે શખ્સ હોસ્પિટલના પ્લાસ્ટિક સર્જરી વોર્ડમાં કોઈ પણ ડર વગર ઘૂસી જતો હતો અને મહિલા કર્મચારીઓને સતત હેરાન-પરેશાન કરતો હતો. હોસ્પિટલ જેવા સંવેદનશીલ સ્થળે જ્યાં ચોવીસ કલાક દર્દીઓ અને તબીબી સ્ટાફની અવરજવર હોય છે, ત્યાં રાત્રિના સમયે મહિલા કર્મચારીઓના રૂમ સુધી પહોંચી જઈ છેડતી કરવાનો પ્રયાસ કરાતાં હોસ્પિટલ સંકુલની સુરક્ષા વ્યવસ્થાની પોલ ખુલ્લી પડી ગઈ છે.

RMO દ્વારા ખટોદરા પોલીસ સ્ટેશનમાં લેખિત ફરિયાદ

બનાવની ગંભીરતાને ધ્યાનમાં રાખીને સુરત સિવિલ હોસ્પિટલના આરએમઓ (RMO) દ્વારા તાત્કાલિક ધોરણે આ મામલે આકરાં પગલાં લેવામાં આવ્યા છે. તેમણે ખટોદરા પોલીસ સ્ટેશનમાં આ માથાભારે શખ્સ વિરુદ્ધ લેખિતમાં સત્તાવાર ફરિયાદ નોંધાવી છે. પોલીસ ફરિયાદમાં મહિલા કર્મચારીઓની સુરક્ષા સુનિશ્ચિત કરવા અને આ અસામાજિક તત્વ સામે વહેલી તકે કડકમાં કડક કાનૂની કાર્યવાહી કરી તેની અટકાયત કરવામાં આવે તેવી ઉગ્ર માંગ કરવામાં આવી છે.

ગુજરાતના વધુ સમાચાર વાંચવા માટે ક્લિક કરો