Surat: ગુજસીટોકને કારણે બંગલાનો કબજો છોડાવ્યો, ગૃહમંત્રી અને કમિશનરના આભાર વ્યક્ત કરતા બેનરો લાગ્યા

સુરત શહેરમાં રાજ્યના ગૃહમંત્રી હર્ષ સંઘવી અને પોલીસ કમિશનર અનુપમસિંહ ગેહલોતના આભાર વ્યક્ત કરતા બેનરો લાગ્યા છે. શહેરના અઠવાલાઇન્સ, ચોપાટી, અઠવાગેટ અને મજુરાગેટ જેવા મુખ્ય વિસ્તારોમાં આ બેનરો જોવા મળ્યા છે, જે ડો. ઝાકિર અયુબ મેમણ દ્વારા લગાવવામાં આવ્યા છે. આ બેનરો લગાવા પાછળનું કારણ સુરત SOG પોલીસની કડક કાર્યવાહી છે. રાંદેર વિસ્તારની કુખ્યાત “સદ્દામ-ગૌડીલ” ગેંગ સામે પોલીસે ગુજસીટોક (GUJCTOC - ગુજરાત કંટ્રોલ ઓફ ટેરરિઝમ એન્ડ ઓર્ગેનાઇઝ્ડ ક્રાઇમ) હેઠળ ગુનો દાખલ કર્યો હતો.

સુરતમાં મિલકત પરત મળતા આભારના બેનરો લાગ્યા

આ ગેંગે ચાર વર્ષથી ગોરાટ રોડ પર આવેલા 'અમી રો-હાઉસ'ના એક બંગલા પર ગેરકાયદે કબજો જમાવ્યો હતો. આ બંગલાની કિંમત આશરે ₹3.5 કરોડ જેટલી આંકવામાં આવી છે. જોકે, ગેંગ સામે ગુજસીટોકનો ગુનો દાખલ થતાં જ ગુંડા તત્વોમાં ફફડાટ ફેલાયો હતો. જેના પરિણામે, ગેંગના સભ્યોએ સામે ચાલીને SOG પોલીસને બંગલાની ચાવી સોંપી દીધી હતી.

સદ્દામ ગેંગ સામે ગુજસીટોકનો ગુનો

પોલીસની આ સખત કાર્યવાહીને કારણે જમીન કે મિલકતનો કબજો મુક્ત થયો, જેનાથી બોગબનાર ડો. ઝાકિર અયુબ મેમણે રાહતનો શ્વાસ લીધો હતો. આ કાર્યવાહીથી ખુશ થઈને, તેમણે રાજ્યના ગૃહમંત્રી અને પોલીસ કમિશનરનો આભાર વ્યક્ત કરવા માટે સમગ્ર શહેરમાં આ બેનરો લગાવ્યા છે.