Rajkotના મોચીબજારમાં નોન-વેજના વેપારી પિતા-પુત્ર પર લાકડી અને છરી વડે હુમલો

રાજકોટ શહેરમાંથી ગુનાખોરીની એક ચોંકાવનારી અને લોહીયાળ ઘટના સામે આવી છે. શહેરના વ્યસ્ત ગણાતા મોચીબજાર ખાટકીવાડ વિસ્તારમાં એક નોન-વેજના વેપારી પિતા અને પુત્ર પર કેટલાક શખ્સો દ્વારા અચાનક જીવલેણ હુમલો કરવામાં આવ્યો હતો. હુમલાખોરો હથિયારો સાથે તૂટી પડતા સમગ્ર બજારમાં ભારે નાસભાગ અને અફરાતફરી મચી ગઈ હતી. આ હિંસક હુમલામાં ફારુક ચૌહાણ નામના સ્થાનિક વેપારીને શરીરના ભાગે છરી અને લાકડીઓના કારણે ગંભીર ઈજાઓ પહોંચી હતી.

હુમલાના સીસીટીવી ફૂટેજ થયા વાયરલ 

આ સમગ્ર લોહીયાળ ઘટનાના લાઈવ સીસીટીવી ફૂટેજ પણ સામે આવ્યા છે, જેમાં હુમલાખોરોની ક્રૂરતા સ્પષ્ટપણે જોઈ શકાય છે. આ ઘટના અંગે ભોગ બનનાર પરિવાર દ્વારા રાજકોટના 'એ' ડિવિઝન પોલીસ સ્ટેશનમાં સત્તાવાર ગુનો દાખલ કરવામાં આવ્યો છે. પોલીસે ભોગ બનનારની ફરિયાદના આધારે મહેબુબ ઉર્ફે મુકુ, મહેબુબ હાસમ, આફતાબ યુસૂફ અને જાફર યુસૂફ નામના ચાર શખ્સો સામે આઈપીસીની વિવિધ કલમો હેઠળ ગુનો નોંધી આગળની કાર્યવાહી હાથ ધરી છે.

જૂની અદાવતમાં ખેલાયો લોહીયાળ ખેલ

પોલીસની પ્રાથમિક તપાસમાં બહાર આવ્યું છે કે આ હિંસક હુમલો કોઈ તાત્કાલિક ઝઘડાને કારણે નહીં, પરંતુ બંને પક્ષો વચ્ચે ચાલી આવતી જૂની અદાવત અને મનદુઃખના કારણે કરવામાં આવ્યો હતો. ગંભીર રીતે ઘવાયેલા વેપારી ફારુક ચૌહાણને તાત્કાલિક અસરથી સારવાર અર્થે નજીકની સિવિલ હોસ્પિટલ ખાતે ખસેડવામાં આવ્યા છે. હાલ 'એ' ડિવિઝન પોલીસે સીસીટીવી ફૂટેજના આધારે કાયદાકીય તપાસ તેજ કરી છે અને ફરાર થઈ ગયેલા તમામ ચારેય હુમલાખોરોને ઝડપી લેવા ચક્રો ગતિમાન કર્યા છે.

ગુજરાતના વધુ સમાચાર વાંચવા માટે ક્લિક કરો